طالبان افغانستانده رسمیتگه تَن آلینمه‌گن بیرحالده حاکمیتینی بېش ییلدن بیری دوام اېتتریب کېلر اېکن یقینده بو گروه، دنیا اینیقسه منطقه ایکّی ییریک مملکتی بۉلمیش تورکیه و روسیه استخبارات اداره‌لری‌نینگ باشلیغلرینی کوتیب آلدی.
بو سفرلر، طالبان‌نینگ سیاسی تقدیرسیزلیگی و افغانستان مساله‌سی بۉییچه دنیا مملکتلری قرارلریده‌گی ناانیقلیکلر همده منطقه‌ده دوام اېته‌یاتگن وضعیتنی نظرده توتگن حالده مهم دیر و شو سبب‌دن تورکیه و روسیه بو رسمیلری کابل‌دن کۉریب چیقیشی مهم سفرلر دېب حسابلنه‌دی.
آلدین‌راق تورکیه استخبارات باشلیغی ابراهیم کالین و حاضر اېسه، روسیه تشقی استخبارات اداره‌سی باشلیغی سرگی ناریشگین شوندی بیرحالده افغانستانگه سفر قیلیب، طالبان بیلن اوچره‌شماقده دیر که بو ایکّی مملکت هم طالبان بیلن رسمی دیپلوماتیک علاقه‌لرینی دوام اېتتیرگن و حتا که روسیه طالباننی رسمیتگه تَن آلگن دنیاده‌گی یالغیز مملکت دیر. دیپلوماتیک علاقه‌لر دوام اېتیب تورگن وضعیتده، استخبارات هیاتی حضوریگه نیمه حاجت بار؟ دېگن سوال هر بیریمیزنینگ آنگیمیزده توغیلیشی ممکن بیر مساله و شو سبب بو یازووده خودّی شو موضوعگه اعتبار قرهتماقچیمیز.
ابراهیم کالیننی سفریدن بیرانچه وقت اۉتدی و اونینگ کابل و قندهارده‌گی حضوریدن سونگ بو تشریف، تورکیه، پاکستان و سعودی عربستان اۉرته‌سیده‌گی «مکه مدافعه بیتیمی»دن سونگ عملگه آشیریلیب، اونده ابراهیم کالین پاکستان و طالبان اۉرته‌سیده‌گی قره‌مه-قرشی‌لیک یوزه‌سیدن سونگّی پیاملرنی طالبانگه یېتیشتیرگن دېب تحلیل قیلیندی. شو سبب‌دن بو مساله‌گه حاضر اونچه‌لیک تۉخته‌لمه‌ی روسیه تشقی استخبارات اداره‌سی باشلیغی سرگی ناریشگین سفرینی سببلرینی کۉریب چیقیشگه اورینه‌میز.
دیپلوماتیک کاناللر موجود بۉلگن حالده، استخبارات هیاتی حضوری تاپیشیگه نیمه حاجت بار دېیلگنده قیسقه قیلیب شونی ایتیش ممکن که سرگی ناریشگین حضوری کبی سفرلر کۉپینچه مهم و استراتیژیک موضوعلر اۉرته‌گه بۉلگن حالده و شونده‌ی موضوعلر تۉغریسیده بیران قیزیل چیزیغلرنی کۉرسه‌تیش مقصدیده عملگه آشیریله‌دی. شوندی اېکن روسیه‌لیک بو یوقاری مرتبه‌لی رسمی مخصوص بیر حرکتلر اوچون بیران مهم پیام و حتا که بیران قیزیل چیزیغلرنی طالبانگه کۉرسه‌تیب کېتیش مقصدیده کابل کېلگنی ممکن دیر.
بوندن تشقری، روسیه تشقی استخبارات اداره‌سی باشلیغی‌نینگ کابلده‌گی حضوری، دیپلوماتیک کاناللرگه ایشانچ یۉقلیگینی کۉرسه‌تیب، روسیه استخبارات باشلیغی مهم موضوعلرنی دیپلوماتیک یۉللر بیلن اېمس بلکه اۉزی کېلیب، طالبان‌نینگ قرار قبول قیله‌یدیگن سیمالری بیلن یوز مه یوز اۉرته‌گه قۉییشنی خواهله‌گنی هم بو تشریف‌نینگ اساسی سببلریدن دېب دېب توشینیش هم ممکن.
روسیه استخبارات اداره‌سی‌نینگ باشلیغی کابلگه سفر قیلگنی‌نینگ باشقه بیر ایری و اعتبارلی تامانی بو رسانه‌ای بۉلیشی دیر. کۉپینچه حالتلرده استخباراتی هیاتلرنی بیر مملکتگه تشریفی یشیرین بۉله‌دی و اولر سِری کېلیب و مقاملر بیلن اوچره‌شیب کېته‌دی. روسیه‌لیک استخباراتی مقام تشریفی بوندی بۉلمه‌ی عامه‌گه آشکار اېتیلیشی بو روسیه، طالبان اوستیده‌گی نفوذینی کۉرسه‌تیش اورینگنیدن کېلیب چیققنی کۉرسه‌تیله‌دی. شوندی اېکن روسیه‌لیک بو مقام‌نینگ بو تشریفی، طالبان اوستیده‌گی تاثیر اوچون دنیا مملکتلری اۉرته‌سیده‌گی رقابت دوامینی ینه بیربار بیزگه اېسله‌تیب و بو تارتیشوولر کوچه‌ییب باره‌یاتگنینی بیلدیره‌دی. چونکه بو سفر رسانه‌ای بۉلیشی بیلن روسیه اۉزی‌نینگ رقیبلری جمله‌دن امریکاگه طالبان اوستیده نفوذی بارلیگینی کۉرسه‌تیشگه اورینگنی ممکن دیر.
دېیرلی بیزگه ینه بیر مساله بیللی بۉله‌دی که طالبان‌نینگ تشقی سیاستیده‌گی موازنتی استه-سیکین سینیشی ممکن چونکه اخیرگی وقتلرده، وضعیت طالبان اوستیده گی نفوذ اوچون مملکتلرنینگ حرکتی جدّی‌لشگنینی کۉرسه‌تدی و شو حرکتلر سبب هم ابراهیم کالین افغانستانگه سفر قیلدی و بو سفر آرتیدن پاکستان هجوملری کۉپه‌یدی و مهم مساله بو که طالبان شوندی تشقی سیاستده‌گی نفوذلر سبب حتا که پاکستانگه جواب قیتریشگه هم قادر بۉلالمه‌دی. چونکه طالبان اوستیده نفوذی بار بیران مملکتنی پاکستانگه قرشی جوابلری بیلن اۉز آلدیدن ساووتیشنی خواهله‌می بو هجوملر برابریده بی‌فرق قالیشگه مجبور بۉلدی.
عینی دمده، سرگی ناریشگین‌نینگ افغانستانگه سفر قیلیشیگه ینه بیر سبب، طالبان و پاکستان اۉرته‌سیده‌گی ضدیتلر هم بۉلیشی ممکن دیر. یقینده مسکو فرمتیده یکونلی اعلامیه طالبان و پاکستان ضدیتی اوچون امضالنمه‌ی قالگنی روسیه اوچون بیرآز بۉلسه هم سیاسی ناکاملیک اېدی. حاضر اېسه شو ناکاملیکدن سونگ روسیه، طالبان و پاکستان ترنگلیکلریده فعاللراق حصه قوشیشنی مقصد قیلگنی هم ممکن دیر. بو احتمال شوندن سونگ جدّی‌لشه دی که روسیه استخبارات باشلیغی‌نینگ افغانستانده‌گی تشریفی بیلن بیر وقتده بو مملکت‌نینگ ایچکی ایشلر وزیری ولادیمیر کولوکولتسف هم پاکستانگه بارگن.
خلاصه قیلیب شوندی ایتیش ممکن که حاضرده کۉپینچه حالتلرده، طالبان بیلن مملکتلر مناسبتی دیپلوماتیک کاناللرگه نسبتن استخباراتی اینتیلیشلری جدّی‌لشگن و شوندی اېکن طالبان تشقی سیاستیده‌گی بېش ییلدن بیری آزگینه بۉلسه سقلب کېله‌یاتگن موازنت ینه بیربار سیناو آستیده قالگن. بو موازنت طالبان خلق‌ارا و ایچکی مشروعیتگه قۉل تاپمه‌گن و افغانستانده ایچیده هم طالبانگه قرشی حرکتلر جدّی‌لشیب باره‌یاتگن بیر وقتده طالبان اوچون حیاتی و مهم مساله دیر.
