۱۵-اکتوبر خلق‌ارا آق عصا کونی مناسبتی بیلن افغانستانده‌گی بیر گروه کۉزی عاجز انسانلر و اولر‌نینگ حقوقلرینی حمایه قیلووچی فعاللر تعلیم امکانیتلری‌نینگ یېتیشمسلیگی، ایش ا‌ۉرینلری‌نینگ یۉقلیگی، حرکتلنیشده‌گی قیینچیلیکلر همده جمعیت‌نینگ کۉزی عاجز انسانلر قابلیتیگه ایشانمسلیگیدن خواطر بیلدیرماقده. اولر‌نینگ اَیتیشیچه، قابلیتگه اېگه بۉلیش و تورلی کسبلرنی اۉرگنیشگه قره‌مه‌ی، کۉپلب کۉزی عاجز انسانلر تعلیم و ایش ساحه‌سیده تېنگ امکانیتلردن فایده‌لنه آلمه‌یپتی. اولر حکومت، خصوصی سکتور و یاردم کۉرسه‌تووچی تشکیلاتلردن تعلیم آلیش، ایش بیلن تامینلنیش همده شهر خدمتلریدن مناسب فایده‌لنیش اوچون کۉزی عاجز انسانلر‌نینگ احتیاجلریگه کۉپراق اعتبار قره‌تیشنی سۉره‌ماقده.
تعلیم امکانیتلری‌نینگ یېتیشمسلیگی و ایش ا‌ۉرینلری‌نینگ یۉقلیگی
طلبه امان‌الله روشن‌دل حیدری‌نینگ اَیتیشیچه، اَیریم کۉزی عاجز انسانلر لیسناس، ماستر و دوکتورا باسقیچلرینی تماملب، تورلی کسبلرنی اۉرگنگن بۉلسه‌لر-ده، هنوز اۉز تعلیم یۉنه‌لیشی و کۉنیکمه‌لریگه ماس ساحه‌لرده ایش تاپه آلمه‌یپتی.
اونینگ سۉزلریگه کۉره، حتا معلوللیگی بۉلگن انسانلرنی قۉللب-قوّتلش مقصدیده تشکیل اېتیلگن اَیریم مؤسسه‌لر هم معلوماتلی و تېگیشلی طلبلرگه جواب بېره‌دیگن کۉزی عاجز انسانلر اوچون ایش امکانیتلرینی یره‌تمه‌یپتی. او جمعیت کۉزی عاجز انسانلرگه اچینیش اۉرنیگه، اولر‌نینگ قابلیتلری و تشبثلرینی توشونیشی کېره‌کلیگینی تأکیدله‌یدی.
روشن‌دیل حیدری شونده‌ی دېیدی: «بیز دنیادن هم، افغانستان جمعیتیدن هم اچینیشنی سۉره‌مه‌یمیز. عکسینچه، بیزگه نسبتاً مناسبتلری برقرار و قطعی بۉلیشینی، قابلیتلریمیز و تشبثلریمیزنی توشونیشلرینی ایسته‌یمیز».
او، شونینگدېک، مکتبلر و بیلیم یورتیلرده زمانوی تعلیم واسطه‌لری‌نینگ یۉقلیگی کۉزی عاجز انسانلر‌نینگ تعلیم آلیش جریانینی قیینلشتیره‌یاتگنینی اَیته‌دی. اونینگ فکریچه، حکومت، خصوصی سکتور و خلق‌ارا تشکیلاتلر مناسب تعلیم شرایطلرینی یره‌تیش همده کۉزی عاجز انسانلر‌نینگ صفتلی تعلیم آلیش امکانیتلرینی کېنگه‌یتیریش اوچون حرکت قیلیشی کېره‌ک.
کسب-هنر تعلیمی و اۉزینی اۉزی تامینلش امکانیتی
کۉزی عاجز انسانلر حقوقلری فعالی سید محمد یزدان‌پر‌ست‌نینگ اَیتیشیچه، کۉزی عاجز باله‌لر و یاشلرگه تعلیم آلیش امکانیتلرینی یره‌تیش عایله‌لر و حکومت ذمّه‌سیده‌گی مسؤولیت دیر. اونینگ سۉزلریگه کۉره، عایله‌لر معلوللیگی بۉلگن باله‌لر بیلن باشقه باله‌لر اۉرته‌سیده فرق قیلمسلیگی، حکومت اېسه اولر‌نینگ تعلیم آلیشی اوچون ضرور شرایطلرنی یره‌تیشی کېره‌ک.
اونینگ قۉشیمچه قیلیشیچه، اَیریم کۉزی عاجز اۉقووچیلر ۱۲-صنفنی توگه‌تگچ، بریل یازووینی بیله‌دیگن اۉقیتووچیلر یېتیشمسلیگی سببلی اۉز ولایتلریده بیلیم یورتیگه کیریش امتحانیده قتنه‌شیشده معمالرگه دوچ کېلماقده. بلخ ولایتیده‌گی کۉزی عاجز و کرلر مکتبیده کۉزی عاجزلر اوچون مخصوص کتابلر همده اۉقوو قوراللری‌نینگ یېتیشمسلیگی هم تعلیم جریانینی قیینلشتیره‌یاتگن باشقه معمالردن بیری دیر.
یزدان‌پرست کۉزی عاجز انسانلر اوچون ایش امکانیتلرینی یره‌تیش و اولر‌نینگ اقتصادی جهتدن اۉزینی اۉزی تامینلشیگه شرایط یره‌تیش مهم‌لیگینی تأکیدله‌یدی. اونینگ اَیتیشیچه، یاردم فقط وقتی-وقتی بیلن بېریله‌دیگن مادّی یاردم بیلن چېکلنیب قالمسلیگی، عکسینچه، کۉزی عاجز انسانلر کسب اۉرگنیب، محنت قیلیش آرقه‌لی اۉزلری و عایله‌لری‌نینگ یشش خرجتلرینی قاپله‌ی آله‌دیگن دستورلر یۉلگه قۉییلیشی کېره‌ک.
اونینگ فکریچه، مزارشریف شهری‌نینگ تنیقلی محصولاتلریدن بیری بۉلگن سوپورگی ایشلب چیقریش اوستاخانه‌لرینی تشکیل اېتیش کۉزی عاجز انسانلر اوچون ایش امکانیتلرینی یره‌تیش یۉللریدن بیری بۉلیشی ممکن. اونینگ اَیتیشیچه، تخمیناً ۳ مینگ دالر مبلغ بیلن بونده‌ی اوستاخانه آچیش آرقه‌لی اۉن نفر کۉزی عاجز انساننی ایش بیلن تأمینلش ممکن.
او کۉزی عاجز عیاللر‌نینگ احوالیگه هم تۉخته‌لیب، اَیریملری عایله‌وی و اجتماعی چېکلاولر، ایشسیزلیک همده اقتصادی معمالر طفیلی تعلیم آلیش و جمعیت حیاتیده اشتراک اېتیش امکانیتیدن محروم بۉله‌یاتگنینی اَیته‌دی. اونینگ فکریچه، اولرگه مونچاق تیکیش، تیکووچیلیک، قالین تۉقیش و عملی صنعت کبی کسبلرنی اۉرگنیش امکانیتینی یره‌تیش کۉزی عاجز عیاللر‌نینگ جمعیتده‌گی فعال اشتراکینی آشیریشگه یاردم بېریشی ممکن.
کۉزی عاجز انسانلرگه اچینیش اېمس، امکانیت کېره‌ک
روانشناس بریالی سعادت ناصریان‌نینگ اَیتیشیچه، جمعیت تامانیدن قبول قیلینیش، شخصی مستقللیک، روحی خوفسیزلیک، اۉزارا حرمت و تېنگ محنت امکانیتلریدن فایده‌لنیش کۉزی عاجز انسانلر‌نینگ مهم احتیاجلریدن دیر.
اونینگ سۉزلریگه کۉره، کۉزی عاجز انسانلر تعلیم، ایش و زمانوی واسطه‌لردن فایده‌لنیش امکانیتیگه اېگه بۉلیش آرقه‌لی کونده‌لیک حیاتلرینی امکان قدَر مستقل روشده آلیب باریشلری کېره‌ک. او مسخره قیلیش، حقارتلش، کمسیتیش و تهدید قیلیش اولر‌نینگ روحی خوفسیزلیگیگه سلبی تأثیر کۉرسه‌تیشی ممکنلیگینی تأکیدله‌یدی.
ناصریان‌نینگ اَیتیشیچه، کۉزی عاجز انسانلرگه مناسبت اچینیشگه اېمس، حرمت و اولر‌نینگ قابلیتلرینی توشونیشگه اساسلنیشی کېره‌ک. او ایش و جمعیت حیاتیده اشتراک اېتیش اوچون تېنگ امکانیتلر یره‌تیش کۉزی عاجز انسانلرنی حقیقی قۉللب-قوّتلش‌نینگ بیر قِسمی اېکنینی تاکیدله‌یدی.
او شونده‌ی دېیدی: «اساسی معما انسانلرنی کۉرمسلیک اېمس، بلکه اولر‌نینگ قابلیتلرینی اعتبارسیز قالدیریش دیر».
اقتصادی معمالر و حرکتلنیشده‌گی قیینچیلیکلر
کۉزی عاجزلر تشکیلاتی باشقروو کېنگشی اعضاسی سید داوود موسوی‌نینگ اَیتیشیچه، اقتصادی معمالر و ایش امکانیتلری‌نینگ یۉقلیگی افغانستانده کۉزی عاجز انسانلر حیاتیده‌گی جدّی قیینچیلیکلردن دیر. اونینگ سۉزلریگه کۉره، کۉپلب کۉزی عاجز انسانلر کونده‌لیک احتیاجلرینی قاندیریش اوچون ضرور ایش امکانیتلری و کسب-هنر تعلیمیدن یېترلیچه فایده‌لنه آلمه‌یپتی.
موسوی، شونینگدېک، پیاده‌لر یۉلکلری‌نینگ ناتېکیسلیگی و اَیریم شهر یۉللری‌نینگ کۉزی عاجز انسانلر اوچون ماسلشتیریلمه‌گنی اولر‌نینگ حرکتلنیشینی قیینلشتیره‌یاتگنینی اَیته‌دی. او بلدیه‌لردن شهر یۉللرینی لایحه‌لش و یخشیلشده کۉزی عاجز انسانلر‌نینگ احتیاجلرینی حسابگه آلیشنی سۉره‌یدی. بو اولرگه خوفسیزراق و مستقلراق حرکتلنیش امکانینی بېره‌دی.
اونینگ قۉشیمچه قیلیشیچه، شهر و قیشلاقلرده اۉتکزیله‌دیگن اَیریم اۉرگنیشلر همده یاردم دستورلریده معلوللیگی بۉلگن انسانلر، اینیقسه، کۉزی عاجزلر اعتباردن چېتده قالماقده. اونینگ اَیتیشیچه، یاردم کۉرسه‌تووچی تشکیلاتلر محتاج عایله‌لرنی انیقلشده کۉزی عاجز انسانلر‌نینگ احوالینی هم حسابگه آلیشی کېره‌ک، چونکه اولر‌نینگ اَیریملری اقتصادی و اجتماعی جهتدن ینه‌ده ضعیف شرایطده یشه‌ماقده.
کۉزی عاجز انسانلر‌نینگ طلبی؛ تېنگ امکانیتلر
کۉزی عاجز انسانلر اۉزلری‌نینگ اساسی حقوقلریگه رعایه اېتیلیشی، تعلیم امکانیتلری یره‌تیلیشی، ایش ا‌ۉرینلری تشکیل اېتیلیشی و شهر خدمتلریدن مناسب فایده‌لنیش امکانیتی تأمینلنیشینی طلب قیلماقده. اولر یاردم کۉرسه‌تووچی تشکیلاتلردن هم یاردم دستورلریده معلوللیگی بۉلگن انسانلرنی، اینیقسه، کۉزی عاجزلرنی استوار گروه صفتیده کۉریب چیقیشنی سۉره‌ماقده.
اولر‌نینگ فکریچه، کسب-هنر تعلیمینی کېنگه‌یتیریش، مناسب تعلیم و ایش واسطه‌لری بیلن تامینلش همده کۉزی عاجز انسانلر‌نینگ قابلیتلریگه ایشانچ بیلدیریش اولر‌نینگ اقتصادي مستقللیگینی آشیریش و جمعیت حیاتیده‌گی اشتراکینی کېنگه‌یتیریشگه یاردم بېره‌دی.
پژواک اخبارات آژانسی‌نینگ ۲۰۲۶-ییل ۸-اکتوبرده اعلان قیلگن و ساغلیقنی سقلش وزیرلیگیگه تیه‌نیلگن حساباتیگه کۉره، افغانستانده ۶۰۰ مینگدن آرتیق کیشی کۉزی عاجز، ینه قریب ۱،۵ میلیون کیشی اېسه کۉریش قابلیتی‌نینگ بوزیلیشی بیلن یشه‌ماقده. اوشبو رقملر کۉریش قابلیتی بوزیلگن انسانلر‌نینگ تعلیم، ساغلیقنی سقلش و اجتماعی خدمتلردن فایده‌لنیش امکانیتلریگه اعتبار قره‌تیش مهم‌لیگینی کۉرسه‌ته‌دی.
