قزاقستان جمهور باشلیغی قاسم جومرت توقایف آستانه شهریده بۉلیب اۉتگن خلق‌ارا «قزاق تیلی» جمعیتی نینگ 10-قورولتاییده نطق سۉزله‌دی. بو حقده قازین فورم آژانسی خبر یازگن.
ییغینگن کیشیلر آلدیده قزاقستان جمهور باشلیغی آنه تیلی نینگ دولت، سیاسی و ملی جهتدن علاحیده اهمیتیگه اېگه اېکنینی تاکیدله‌دی. او اوشبو تدبیر اهمیتیگه اشاره قیلیب، تیل مسله‌سی بوگونگی کونده بوتون دنیاده تاباره نازیک و اونوملی تیماگه ایلنیب باره‌یاتگنیگه هم اورغو بېردی.
جمهور باشلیغ توقایف، قتنشووچیلردن منتدارلیک بیلدیریب، برچه توصیه‌لر پیشیق کۉریب چیقیلیشینی و کېله‌سی فعالیتده اینابتگه آلینیشی کېره‌کلیگینی ایتدی.
شونینگدېک، او 1989-ییلده تانیقلی تیل شناسلر عبدوعلی قیدر و عمیرزاق آیتبایف تشبثی بیلن تشکیل اېتیلگن «قزاق تیلی» جمعیتی نینگ تاریخی رولیگه تۉختلیب اۉتدی. اینیقسه، اونینگ تورلی رېجه‌لر و تشبثلر آرقه‌لی دولت تیلینی ترغیب قیلیش حقیده‌گی ایزچیل تلاشلرنی یوقاری بهاله‌دی.
توقایف تانیقلی یازووچی ابیش کیکیل‌بایف نینگ «تیل موقعی-اېل موقعی» دېگن سۉزلرینی کېلتیریب، تیلنی ملی قدریتی و انسانیت نینگ بویوک یوتوقلریدن بیری دېب اته‌دی.
ایلگریراق توقایف خلق‌ارا «قزاق تیلی» جمعیتی باشلیغی روان کنژخانولی بیلن اوچرشگندی. او توقایفگه -جمعیت قزاق تیلینی اۉقیتیش میتودینی تکامللشتیریش، دیجیتال کانتینی کېنگیتیریش و تیلینی ینگی تکنالوژیلرگه قۉشیش و اولردن فایدهلنیشگه اعتبار قره‌یاتگنینی معلوم قیلدی.
