افغانستان ژورنالیست‌لری مرکزی ۲۷ – حوت ژورنالیست‌لر ملی کونی مناسبتی بیلن اۉزینی بیر ییل‌لیک گزارشینی ترقه‌تیب، افغانستان‌ده ژورنالیست‌لر و یېتکرمه‌لر وضعیتیدن خواطر بیلدیردی.
اوشبو گزارش‌گه اساس، قویاش ۱۴۰۲ – ییل جریانیده، افغانستان ژورنالیست‌لری مرکزی تامانیدن، ژورنالیست‌لر و یېتکرمه‌لر حقلرینی نقض اېتیلگن ۱۳۹ واقعه رویخطگه آلینگن.
اوشبو واقعه‌لر جمله‌سیدن، ۸۰ واقعه‌سی تهدید و ۵۹ واقعه‌سی اېسه حبسگه آلینیشدن عبارت دیر.
بو مرکز گزارشی گه کۉره، ژورنالیست‌لر و یېتکرمه‌لر حقلری نقض اېتیلیشی اۉتگن بیر ییل‌گه نسبتن کمی کورینیشیده کمه‌یگن بیراق کیفی کورینیشده اېسه خواطرلی حالده دوام اېتماقده.
افغانستان ژورنالیست‌لری مرکزی نینگ ییل‌لیک گزارشیگه اساس، اۉتگن بیر ییل جریانیده ۷ یېتکرمه فعالیتی طالبان تامانیدن وقتینچه‌لیک تۉخته‌تیلگن و ایکی ژورنالیست اېسه بو حکومت تامانیدن محاکمه اېتیلگن که حاضر هم بو ژورنالیست‌لردن بیرته‌سی قماقده سقلنیب کیلماقده.
افغانستان ژورنالیست‌لری مرکزی نینگ ییل‌لیک گزارشیده، طالبان نینگ امر بالمعروف وزیرلیگی همده استخبارات اداره‌سی، ژورنالیست‌لر اوستیده کوپلب باسیم کیلتیرگن اداره‌لر اوله‌راق آت توتیلگن.
