ایران مملکتی یېتکرمه‌لری نینگ گزارش بیریشیچه، بو مملکت ایچکی ایشلر وزیرلیگی تامانیدن، جمهورلیک ریاست سیلاویده نامزد شخص‌لرنی رویخط‌گه آلیش جریانی پنجشنبه کون‌دن باشلنیب، حاضرگه قدر دوام اېتماقده..
دیمک بو جریان اېرته یکونلنیشی قرار قیلینگن.
ایران اسلامی جمهوریتی، بو مملکت جمهور باشلیغی ابراهیم رییسی اۉلیمی آرتیدن سیلاو اوتکزیب، ینگی حکومت تشکیل بېرماقده.
بو مرته سیلاوده نامزد بۉلیش اوچون تیارگرلیک کورسه‌تگن شخص‌لر آره‌سیده ایران‌لیک تانیقلی سیاسی سیمالر موجود دیر.
بو سیمالردن بیری ایران سابق جمهور باشلیغی محمود احمدی‌نژاد دیر که اۉزینی سیلاوده نامزد قیلماقده.
ایران جمهورلیک ریاست سیلاوی نینگ اۉتگن دوریده، جناب احمدی‌نژادگه نامزدلیک اوچون رخصت بېریلمه‌گن اېدی.
ایران مجلس نینگ سابق باشلیغی علی لاریجانی، بو مملکت سابق ساغلیق‌نی سقلش وزیری مسعود پزشکیان، ایران مرکزی بانک نینگ سابق باشلیغی عبدالناصر همتی، ایران مجلس نینگ سابق اعضالریدن بۉلمیش احمدرسولی نژاد، حبیب‌الله دهمرده، محمدرضا میرتاج‌الدینی، فداحسین مالکی، ایران رهبری آیت الله خامنه‌ای اداره‌سی نینگ رسمی‌لریدن بۉلمیش وحید حقانیان، ایران سیاسی سیمالریدن بۉلمیش محمود احمدی بیغش، ایران جمهورلیک ریاست سیلاویده اۉزلرینی نامزد قیلگن باشقه مهم شخص‌لر دیر.
بو سیاسی سیمالر یانیده، ایران‌ده بیلیم یورت استادلریدن بیری محمد خوشچهره هم اۉزینی نامزدلیگینی اعلان قیلگن.
شونینگدېک، ایران جمهورلیک ریاست سیلاویده اۉزلرینی نامزد اعلان قیلگن سیمالر آره‌سیده بیرته عیال هم کورینه‌دی.
ایران یېتکرمه‌لری بو عیال‌دن زهره الهیان دېب آت توتگن که بو کیشی ایلگری مجلس اعضاسی اېکن.
ایران جمهورلیک ریاست سیلاویده اۉزلرینی نامزد قیلیش اوچون کمیده ۸۰ کیشی ایچکی ایشلر وزیرلیگیده بارگنی ایتیلماقده.
