امریکا و ایراننینگ اوزاق ییللیک تارتیشوولری نهایتده یقین شرق حدودیده کېنگ بیر ناتینچیلیک وضعیتنی کېلتیریب چیقرگن.
اخیرگی بیر یریم آی ایچیده، امریکا و اسراییلنینگ ایرانگه قرشی هجومی بیلن باشلنگن اوروش نه فقط ایران بلکه عرب مملکتلری و یقین شرق حدودیده کېنگ ناتینچیلیکلرنی اۉرتهگه آلیب کېلدی. حاضر اېسه بیر هفتهدن بېری امریکا و ایران اۉرتهسیده آتیش-کېسین کېلیشووی برقرارلهنیشی بیلن، اوشبو حربی تۉقنهشوو سېزلرلی درجهده آزهیگن. بیراق اسلامآبادده اۉتکزیلگن مذاکرهنینگ نتیجهسیز یکونلنیشی و امریکانینگ ایران دېنگیز بندرلری جملهدن هرمز بۉغازینی قمل قیلیش حرکتلری، تارتیشوولر و اوروشلر ینهده کوچهیشی خصوصیده خواطرلرنی توغدیرگن.
خوفسیزلیک و سیاسی مسالهلر بۉییچه تحلیلچی اسدالله ندیمنینگ بو خصوصده ایتیشیچه: «هرمز بۉغازیده ایگه چیقماق، امریکا قوتلرینی آلدیدن آغیر بیر ایش اېمس امام امریکالیکلر خواهلهیدی که دنیانی بو یېرده ارهلشتیرسه، حقیقتده هندوستان، چین، کوریا، جاپان تیللری شو یۉلدن اوتهدی بو مملکتلر امریکا هجوملریدن حمایه قیلمهدی و امریکا خواهلهیدی که شو مملکتلرنی باسیم آستیده آلسه.»
ایران و امریکا اۉرتهسیدهگی حربی قرمه-قرشیلیک شوندهی بیر آغیر وضعیتده دوام اېتر اېکن بیراق هلی هم تامانلر ینه بیربار مذاکرهگه قیتیشی خصوصیده امیدلر موجود دیر.
بیرلشگن ملتلر تشکیلاتینینگ باش کاتبی آنتونیو گوتریش امریکا و ایران ینه مذاکره اۉتکزیشی احتمالی کۉپ دېب، اوروش یکونلنیشینینگ یالغیز یۉلی مذاکره دېب بیلدیرهدی.
گوترش ژورنالیستلر بیلن بۉلگن صحبتیده شوندهی دېگن: «مېن اویلهیمن بوندهی جدی و اوزاق مدتلیک کېلیشماوچیلیک بیر مرته مذاکره اۉتکزیش بیلن حل اېتیلیشی کوتیلمهیدی شو سبب مذاکرهلر دوام اېتیشی و آتیش-کېسین سقلنیشی ضرور دیر.»
ایراننینگ امریکا و اسراییل بیلن اوروشی، نه فقط کېنگ ناتینچیلیکلرنی اۉرتهگه آلیب کېلگن بلکه دنیا اقتصادی اوستیگه هم انرژی تنقیصلیگی کبی کتّه ضررنی کېلتیریب چیقرگن.
حاضر اېسه امریکا و ایران مذاکرهلرینینگ تقدیری بېللی بۉلمهگنی و دېنگیز یۉللرینی قمل قیلیش خصوصیده امریکا حرکتلری هم دنیا اقتصادیاتی جدّی تاثیر کۉرسهتیشی ممکنلیگی ایتیلهدی.
اقتصادی مسالهلر بۉییچه تحلیلچی عتیق الله متیننینگ ایتیشیچه: «هرمز بۉغازی دنیانینگ اساسی اقتصادی و سیاسی یۉللریدن بیری حسابلنهدی چونکه شو یۉلدن دنیانینگ ۲۰ فایزدن کۉپراق نفتی اوتیب، ختای، امریکا و اروپاگه صادر اېتیلهدی و بو یېرده نفت ایشلب چیقرهدیگن مملکت اېسه ایران، سعودی عربستان و بیرلشگن عرب امیرلیکلری دیر شو سبب بونینگ دنیا اقتصادیاتیده کتّه رولی بار.»
بو شوندهی بیرحالده دیر که امریکانینگ مالیه وزیری اسکات بسنت یقینده، اېندی امریکا هرمز بۉغازی و دېنگیز چېگرهلرینی قمل قیلیشی بیلن چین ایران نفتنی ساتیب آلیشگه قادر اېمس دېب بیلدیرگن. دېیرلی امریکا بو حرکتیدن مقصد نهفقط ایران باسیم آستیده آلینگنی بلکه چین و هرمز بۉغازی آرقهلی انرژی تامیناتیده باغلیق مملکت هم باسیم آستیده قالیشی و بو اېسه کېسکینلیکلرنی ینگی بیر باسقیچده دوام اېتتریشی خصوصیده فکرلرنی یرهتگن.
