تخار ولایتیده منبعلرنینگ اۉزبېک تیوی گه ایتیشیچه، بو ولایتده طالبان تامانیدن پاکستاندن آلیب کېلینگن مهاجرلر بیر مکتبنینگ بنا و میدانینی باسیب آلیب، اۉقووچیلرنی مکتب باریشیگه توسقینلیک قیلگن.
منبعلرنینگ ایتیشیچه، تخار ولایتی «عربکاکل» قیشلاغیدهگی مکتبنی پاکستاندن آلیب کېلینگن مهاجرلر باسیب آلگن.
محلی اهالی معلوماتی اساسیده، بو مهاجرلر اۉتگن قیش موسومی طالبان تامانیدن آلیب کېلینیب بو یېرده جایلشتیریلگن و حاضرگچه مکتب یېری اوستیده دعوا قیلیب، مکتبنی اۉقووچیلر یوزیگه یاپیب قۉیگن.
تخار یشاوچیلریدن بیرینینگ اۉزبېک تیوی گه ایتیشیچه: «شو قیشده پاکستاندن مهاجرلر کېلیب مکتب چمنی و ساحهسینی ایگللهگن اېدی. حاضر مکتب باشلهنیشی بیلن اولر تدریسگه رخصت بېرمهیدی. مردمنینگ بالهلری بیسرنوشت شوندهی تۉختهگن.»
شونینگدېک اهالینینگ ایتیشیچه، بو مهاجرلر طالبان حکومتیدهگی تانیشلری و پول بیلن منطقه اهالیسی اولهراق تذکره توزاتیشگه هم اورینماقده.
اهالی مذکور ناتانیش شخصلر حرکتلریدن خواطر بیلدیریب، اولر تامانیدن مکتب اۉقووچیلر یوزیگه یاپیلگنینی بیلدیرهدی.
تخارلیک بیر یشاوچینینگ قۉشیمچه قیلیشیچه: « مکتب یېری اوستیگه دعوالری بار، اولر تذکره آلیش اوچون سعی و تلاش قیلهدیلر، اهالی بولر تذکره آلگندن سۉنگ بیزلرنی کۉپراق اذیت قیلهدیلر دیب تشویشدهلر.»
شو بیلن بیرگه، فاریاب ولایتی اندخوی اولسواللیگیده هم طالبان محلی رسمیلری ایریم ناتانیش شخصلرگه تذکره ترقهیاتگنی ایتیلهدی.
