بیرلشگن عرب امیرلیگینینگ مدافعه وزیرلیگی اوشبو مملکت هوا مدافعهسی تیزیمی راکت و درون هجوملریگه قرشی فعال حرکت قیلگنینی معلوم قیلدی.
وزیرلیک بوگون اېرتهلب (جمعه،۱۸-ثور) ایکس اجتماعي ترماغیده مملکت بۉیلب اېشیتیلگن پارتلش و تاووشلر راکت همده درونلرگه قرشی عملگه آشیریلگن مدافعه عملیاتی نتیجهسی اېکنینی یازدی.
بیرلشگن عرب امیرلیگینینگ مدافعه وزیرلیگی اهالیدن «خاطرجمعلیکنی سقلش و تېگیشلی ادارهلر تامانیدن چیقریلگن خوفسیزلیک کۉرسهتمهلریگه عمل قیلیش»نی سۉرهدی.
وزیرلیک شونینگدېک شوندهی تأکیدلهدی: «موفقیتلی هوا توتیب قالیش عملیاتلریدن کېین یېرگه توشگن قالدیق یاکه پرچهلر یقینیگه هېچ قندهی حالتده بارمنگ، اولرگه تېگمنگ و صورتگه آلمهنگ. وضعیتنی تېگیشلی اۉرگانلر تېکشیریشیگه امکان بېرینگ.»
وزیرلیک اوشبو راکت و درونلر قَیسی دولتدن اوچیریلگنینی انیق ایتمهدی. بیراق، بوندن آلدین بیر نېچه بار ایراننی شوندهی هجوملرده عیبلهگن اېدی.
مذکور هجوملر ایران و امریکا قۉشمه ایالتلرینینگ هرمزده یوز بېرگن دېنگیز تۉقنهشوویدن بیر ساعت اۉتیب صادر بۉلدی. اوشبو حادثه صلح اۉرنهتیلگنیدن کېینگی اېنگ جدّي کېسکینلشوو صفتیده بهالنماقده.
