محمد کریم خلیلی باشچیلیگیده گی «افغانستان اسلامي وحدت حزبی» طالبان تامانیدن کابلده دین عالِمی حسین داد شریفيگه نسبتاً «حقارت، کلتکلش و کمسیتووچی مناسبت»نی افغانستاندهگی شیعهلرگه قرشی تیزیملی تبعیض نینگ بیر قِسمی دېب اتهدی.
مذکور حزب بوگون (یکشنبه، ۲۷-ثور) چیقرگن بیاناتیده اوشبو دین عالمیگه نسبتاً بۉلگن معاملهنی قارهلب، اونی «افغانستان هزارهلر و شیعهلری نینگ دیني اېرکینلیکلریگه تجاوز» دېب تعریفلهگن.
حزب فکریچه، حسین داد شریفي نینگ «جعفري فقه یگه موافق شریعت نکاحینی اۉقیشی» سببلی اونگه نسبتاً «حقارت و کلتکلش» بو عادي دیني کېلیشماوچیلیک اېمس، بلکه «خوفلی تیزیملی تبعیض جریانی نینگ بیر قِسمی»دیر.
حزب نینگ تأکیدلشیچه، طالبان باشقرووی آستیده شیعهلرنینگ دیني، مدني و اجتماعي اۉزیگه خاصلیگی باسیم، کمسیتیش و چېتلهتیش آستیده قالماقده.
شونینگدېک، آگاهلنتیریش بېریلیشیچه، بوندهی تبعیض سیاستلر دوام اېتسه، هزارهلر و شیعهلرگه قرشی دیني، اېتنیک و اجتماعي باسیملر افغانستاننی ینه-ده آغیر بحرانلرگه آلیب باریشی ممکن.
حزب، «عبدالرحمن دوریدهگی فاجعهلر تجربهسی کۉرسهتهدیکی، کمسیتیش، تحقیرلش و باستیریش سیاستی نه برقرارلیک، نه بیرلیک کېلتیرهدی، عکسینچه جمعیتده نفرت و اوزاق مدتلی بحران اوروغینی ساچهدی»، دېب تأکیدلهگن.
حاضرده رهبری سورگونده بۉلگن اوشبو سیاسي حزب خلقارا انسان حقوقلری تشکیلاتلری و اسلامي انستیتوتلرنی طالبان نینگ هزارهلر و شیعهلرگه مناسبتیگه بېفرق بۉلمسلیککه و «ثمرهلی حمایه چارهلرینی کۉریشگه» چقیرگن.
حسین داد شریفي، شیعه دین عالِمی، جمعه کونی (۲۵-ثور) کابل نینگ دشت برچی حدودیدهگی مسجدده قیلگن چیقیشیده ایتیشیچه، او «مؤقت نکاح» اۉقیگنی اوچون کابل نینگ ۱۸-خوفسیزلیک حوزهسیگه چقیریلیب، طالبان تامانیدن کلتکلنگن.
اونینگ سۉزلریگه کۉره، خوفسیزلیک بۉلیمیده کۉپلب شیعه دین عالِملری چقیریلیب، اولردن اېندی بوندهی نکاحلرنی اۉقیمسلیک بۉییچه کفالت آلینگن.
«شیعهلر عالي کمیسیونسی» اۉتگن هفته بو حادثهگه جوابن طالبان نینگ «امر به معروف و نهی از منکر» وزیرلیگیدن مسألهنی تېکشیریش و ناتۉغری معاملهلرنی کۉریب چیقیشنی سۉرهگن.
محمد محقق، «افغانستان خلقی اسلامي بیرلیک حزبی» یېتکچیسی هم بو واقعهگه مناسبت بیلدیریب، طالباندن شیعهلرنینگ شخصي احوالی مسألهسینی عمومي قانونلردن استثنا قیلیشنی طلب قیلگن.
اونینگ ایتیشیچه، شخصي احوال قانونلرینی دیني مذهبلر بۉییچه اجرهتیش باشقه مسلمان دولتلریده هم موجود بۉلیب، بو افغانستان نینگ سابق جمهوریت اساسی قانونیگه هم انابتگه آلینگن اېدی.
