طالباننینگ مدافعه وزیری و بو گروه اساسچیسینینگ اۉغلی محمدیعقوب مجاهد یقینده روسیهگه سفر قیلیب بو یېرده ایلیق کوتیب آلیندی و بو سفرنینگ اېنگ کۉپ محاکمهلرگه سبب بۉلگن مسالهلریدن بیری روسیه بیلن طالبان اۉرتهسیده حربی-تخنیک کېلیشووی امضالنگنی اېدی. شوندهی بیر کېلیشوو طالبان کبی بیر ایچکی و خلقارا مشروعیتگه اېگه بۉلمهگن دیفکتو رژیم بیلن امضالنیشی اۉزی بحثلرگه سبب بۉلووچی مساله بۉلسه-ده؛ بیراق طالبان بیلن پاکستان اۉرتهسیده ترنگلیکلر دوام اېتهیاتگن بیر پیتده بو گروه دنیانینگ ییریک کوچلی مملکتلریدن بیری بیلن حربی کېلیشوو امضالشی کېنگ کۉلمده محاکمهلرنی اۉرتهگه آلیب کېلووچی اساسی سبب اېدی.
حاضر اېسه، روسیه طالبانگه بوندهی امتیازلر بیلن نیمه آرتیدن اېکنی و حقیقتدن هم بو حربی-تخنیک ساحهسیگه قرهتیلگن بو کېلیشوو طالباننی پاکستانگه قرشی کوچلنتیرهمی؟ یا که بونچهلیک روسیه بیلن یقینلشیش طالبان تشقی سیاستیده نیمه عاقبتلرنی اۉرتهگه آلیب کېلیشی ممکنلیگی حقیده سواللرنی توغدیرهدی؟
روسیه، بوندن چمهسی بېش ییل آلدین افغانستان حکومتی طالبان قۉلیگه توشیب قالگنیدن کېین، بو مملکت بیلن دیپلوماتیک مناسبتلرنی دوام بېرگن مملکتلردن بیری دیر. البته بو قرار امریکاگه ضد طالباندن روسیهنینگ اوزاق ییللیک یشیرین حمایهلریدن کېلیب چیققن بۉلسه-ده بیراق اوندن کوچلیراق روسیه، امریکا بیلن رقابتلریده، افغانستان حاکمیتیده قیسی گروه بۉلیشیدن قطعینظر بو حاکمیتنی اۉزی بیلن سقلشده اورینگنی سبب دیر. روسیهنینگ انهشوو سیاستی سبب، چمهسی اۉتگن بېش ییل مابینیده روسیه کېتمه-کېت امتیازلرنی طالبانگه کۉرسهتیب، بو گروهنی اۉزی بیلن سقلشده اوریندی. طالبان بیلن دیپلوماتیک علاقهلرنی سقلش، مسکوده افغانستان اېلچیخانهسینی طالبانگه تاپشیریش، طالباننی روسیه ترورچیلیک قاره رویخطیدن چیقریش و نهایت بو طالبان حاکمیتنی رسمیتگه تَن آلیش امتیازلر روسیه تامانیدن باسقیچمه-باسقیچ طالبانگه بېریلدی. اۉزی اوکراینده کتّه بیر ماجرا بیلن بند بۉلگن روسیه باشقه بیران مملکتده حربی یا -ده اقتصادی باسیم و نفوذگه اېگه بۉلمسه-ده بیراق قۉلیده بار ابزاری یالغیز سیاسی امتیازلر اېدی که روسیه اۉتگن یقین بېش ییل دوامیده طالبانگه نسبتن بو امتیازلرنی دېیرلی برچهسیدن فایدهلندی. حاضر اېسه سیاسی امتیازلر یکونلنیشی بیلن کۉرینیشیچه، روسیه هلی هم طالباننی اۉز یانیده سقلش اوچون بها بېریشگه اورینماقده دیر و شو سبب بو مملکت طالبان بیلن حربی-تخنیک کېلیشووینی امضا قیلگنی کۉرینهدی.
شوندهی که یوقاریده اېسلب اۉتدیک، روسیهنینگ بو کېلیشووی طالبان و پاکستان اۉرتهسیده قرهمه-قرشیلیکلر دوام اېتهیاتگن بیر پیتده امضالنیشی، خاص اهمیتگه اېگه اېدی و بو کېلیشوونی امضالنیشیگه سبب بۉلگن سفردن قیتهیاتگن طالبان مدافعه وزیری محمد یعقوب مجاهدنینگ «اېندی پاکستان، افغانستانگه هوا هجوملرینی اویوشتیریشگه جرات اېتالمسلیگی مقصدیده حرکت قیلهیپمیز.» دېگن نطقی، بو کېلیشوو پاکستانگه قرشی طالبانگه کوچ و ایشانچ بېرگنی کۉرینهدی. بیراق حقیقتده بو کېلیشوو طالبان اوچون ینگی تارتیشوولر و ضدیتلرنی هم اۉرتهگه آلیب کېلیشی ممکن. چونکه پاکستان اوزاق ییللردن بیری اۉزینینگ تشقی سیاستیده غرب مملکتلری اینیقسه امریکا قۉشمه ایالتلریگه مایل بۉلیب کېلگن و اېندی اېسه طالبان امریکانینگ اساسی رقیبی بۉلمیش روسیه بیلن حربی کېلیشووگه قۉل تاپیشی طالبان اوستیده پاکستان آرقهلی بۉلگن باسیملرنی کۉپهیتیریلیشی و طالبان یقین بېش ییل حاکمیتیده دنیا مملکتلری اینیقسه دنیادهگی روسیه، چین و امریکا کبی کوچلی مملکتلرگه نسبتن بۉلگن سیاستلریده جدّی اعتبار قرهتیب کېلگن موازنتنی بوزیشی ممکن. بوندن تشقری، روسیه هم حاضرگی شرایطده طالبان بیلن اونچهلیک همکارلیکده بۉلیش نیتیده اېمسلیگی ممکن که بو حربی همکارلیک سبب پاکستان کبی بیر مملکت بیلن اۉزی دشمنلیکده قۉیسه چونکه حاضر اوکراین ماجراسی بیلن بند بۉلگن روسیه اۉزیگه یقین مملکتلرنی تاپیشده اورینماقده و ضدیتلرنی کۉپهیتیریشده اېمس. شو سبب، طالبان تامانیدن روسیه بیلن بۉلگن حربی-تخنیک کېلیشووی کینگ یاریتیلهیاتگن وقتده، روسیهنینگ مخصوص وکیلی ضمیر کابلوف بو کېلیشوو یالغیز روسیهنینگ قوراللرینی ترمیملشده چیکلنگن دېب اعلام قیلدی. دېمک روسیه طالباننی شونچهلیک خواهلهیدی که حاضرگی رقابتده اۉزینی یانیده بیرته یار بۉلسه و بو امتیازدن فایدهلنسه نه که بو یقینلشیش روسیه اوچون ینگی بیر ضدیت اۉرتهگه آلیب کېلسه.
شو موضوعلرنی نظرده توتگن حالده، خلاصه قیلیب شونی ایتیش ممکن که طالباننینگ روسیه بیلن حربی کېلیشووی نه فقط بو گروهنی اونچهلیک کوچلنتیریشی ممکن بلکه بو گروه اوچون ینگی باسیملرنی هم اۉرتهگه آلیب کېلیشی ممکن. اگرده پاکستان و امریکا حقیقتا هم طالبان تۉلیق روسیه تامان اۉتگنینی سیزگن تقدیرده، جدّی باسیملر اوستیگه اویلهشی ممکن بوندهی بۉلگن تقدیرده طالبان کۉپراق باسیم آستیده قالهدی چونکه روسیه نه حربی و استخباراتی کۉرینیشده، طالبان اوستیده پاکستان کبی تاثیرگه اېگه و نه هم اقتصادی و سیاسی کۉرینیشده امریکا کبی افغانستانده تاثیری بار. چونکه حاضر هم طالبان حاکمیتی و افغانستان مالی بازارلری نرمال یوریب توریشینینگ اساسی سببلریدن بیری امریکانینگ هفتهلیک میلیونلب دالر یاردمی دیر بو یاردملر کېسیلگن تقدیرده، روسیه حاضرگی اقتصادی شرایطیده اونگه بدیل بۉلالمسلیگی انیق.
