پاکستان هوا کوچلری اۉتگن کېچه ینه بیربار، افغانستان حدودلریگه هوا هجوملرینی اویوشتیریب، خوست، کنر و پکتیکا ولایتلریدهگی ایریم حدودلرنی نشانگه توتدی. طالباننینگ ادعا قیلیشیچه، پاکستاننینگ اوشبو هجوملری عاقبتیده ۱۳ کیشی جان بېریب و ینه ۱۴ کیشی یرهلنگن.
پاکستان اوشبو هجومی شوندهی بیرحالده عملگه آشیریلماقده دیر که طالبان و پاکستان اۉرتهسیدهگی جاری میلادی ییلنینگ ۲۱-فبرویدن سۉنگ باشلنگن کېنگ تۉقنهشوولر ۴۰ کون دوام اېتیشدن سۉنگ تۉختهتیلگن اېدی و حاضرگچه اسلامآباد و کابل اعلام اېتیلمهگن تینچلیک کېلیشووده بۉلیب کېلماقده اېدی.
حاضر اېسه، پاکستان ینه بیربار افغانستان حدودیگه قرشی هجوم اویوشتیریشی، ایکّی تامان اۉرتهسیدهگی مذاکرهلر نتیجه بېرمهی ینه ترنگلیکلر باشلنگنمی یا -ده بو هجوملر قنچهلیک طالباننینگ روسیه بیلن یقینلشیشی و کېلیشووی امضالنیشیگه تېگیشلی اېکنی حقیده بیر قنچه سواللرنی تۉغدیرهدی.
پاکستان و طالبان تۉقنهشوولری ینگی بیر باسقیچگه اوتدیمی؟
پاکستان بیر مدتلیک تنفسدن سۉنگ ینه بیربار، اۉتگن کېچه افغانستاننینگ اوچ ولایتیگه هوا هجوملرینی اویوشتیردی. پاکستان و طالبان تۉقنهشوولری سۉنگّی وقتلر ایچیده شوندهی بیرحالده تۉختهتیلگن اېدی که ایکّی تامان اۉرتهسیده کېلیشماوچیلیکلرنی حل اېتیش اوچون مذاکرهلر دوام اېتهیاتگن اېدی و بو مذاکرهلرنینگ اینگ مهمی چین واسطهچیلیگیده بۉلگن اورومچی اوچرهشووی اېدی.
بوندن تشقری، طالبان و پاکستان وکیللری، تورکیهده هم بیر قنچه نارسمی اوچرهشوولرنی اۉتکزیب، کېلیشماوچیکلرگه یېچیم-یۉل تاپیش بۉییچه بحثلرنی ایلگری آلیب بارگنی خبر قیلینگن. دېمک حاضرگچه اوشبو مذاکرهلرنینگ هیچ بیریدن ایجابی نتیجه چیقمهگن و شوندهی بیر شرایطده پاکستان ینه بیربار کېنگ هوا هجوملرینی عملگه آشیریشی ایکّی تامان تۉقنهشوولر قیته باشلنیشی ممکنلیگی و پاکستان اېندی مذاکرهلردن نتیجه کوتمهیاتگنینی بېللی قیلهدی.
دېیرلی، اوشبو تۉقنهشوولر اېندی قندهی دوام اېتیشینی طالباننینگ پاکستان بو هجوملریگه جوابی قندهیلیگی و اسلامآبادنینگ بوندن کیینگی بۉلگن حرکتلری بېللی قیلهدی. حاضرگچه انیق بۉلگن نرسه شو دیر که پاکستان و طالباننینگ چین واسطهچیلیگیده بۉلگن سۉزلشوولری ایجابی نتیجه بېرمهگن و بو اېسه پاکستان ینه بیربار حربی تَنلاوگه یوز کېلتیریشیگه مجبور قیلگن.
پاکستان هجوملری طالبان بیلن روسیه یقینلشیشیگه جواب اېدیمی؟
پاکستان بو مرته طالبانگه قرشی هجوملرینی شوندهی بیرحالده عملگه آشیرماقده دیر که یقینده طالبان مدافعه وزیری محمدیعقوب مجاهد روسیهگه بۉلگن سفریده، طالبان و روسیه اۉرتهسیده حربی-تخنیک کېلیشووی امضالنگن اېدی.
اوشبو کېلیشوو تۉغریدن-تۉغری پاکستانگه ضدیتنی نظرده توتگن بۉلمسه-ده بیراق طالبان مدافعه وزیری روسیهدن قیتگندن سۉنگ، اوشبو کېلیشووگه تهینیب، «اېندی پاکستان، افغانستانگه قرشی هجوا هجوملرینی اویوشتیریشگه جرات اېتمسلیگی مقصدیده سعیوحرکت قیلماقدهمیز.»دېب بیلدیردی. پاکستان اۉتگن کېچه اویوشتیرگن هجوملری طالبانگه هلی هم اوشبو جرات و کوچگه اېگه اېکنینی بیلدیرهیاتگنی بۉلیشی ممکن دیر.
بوندن تشقری، ینه بیر احتمال شو دیر که حقیقتا طالبان بیلن روسیه اۉرتهسیدهگی حربی-تخنیک کېلیشوو، پاکستان و امریکا بیلن ضدیت معناسیده بۉلسه، بو هجوم طالبانگه روسیه بیلن یقینلشیشی اوچون بۉلگن باسیملرنینگ باشلنیشی بۉلیشی هم احتمالدن تشقری اېمس.
طالبان پاکستانگه قرشی اوروشده تیارمی؟
طالبان ینه شوندهی بیر شرایطده پاکستان بیلن تۉقنهشوولرنینگ ینگی بیر باسقیچنی باشلنیش خوفی آستیده توریبتی که بو گروهنینگ حربی کوچی پاکستاننینگ سۉنگّی هجوملری عاقبتیده آغیر ضربهگه اوچرهگن.
پاکستان تامانیدن جاری میلادی ییلنینگ ۲۱ – فبروریسیدن سۉنگ افغانستاننینگ شرقی حدودلری همده کابل ایریم نقطهلریگه هوا هجوملری بیلن نشانگه توتیلگنی آرتیدن، طالبان هم تېز جواب قیتریب کېلگن اېدی و طالباننینگ تۉقنهشوولر بیرینچی کونلریدهگی جوابلری شونچهلیک جدّی اېدی که بو گروه دُرون اوچیریب حتا که اسلامآبادگه یقین حدودلرنی هم نشانگه توتیشگه اوریندی. بیراق پاکستان هجوملری دوامی و بو هجوملر آرقهلی طالباننینگ حربی مرکزلری نشانگه توتیلیشی سبب، طالباننینگ جواب قیتریشی استه-سیکین آزهییب، حتا که طالبان جاری میلادی ییلنینگ ۱۶- مارچ کېچهسی کابلنینگ «امید شفاخانه»سیگه اویوشتیرگن قانلی هجومینی هم جوابسیز قالدیرگن. ایلگری طالبان پاکستاننینگ عادیراق بیر چېگره آتیشمهسیگه هم جواب قیتریشگه اورینگن بۉلسهده بیراق ۴۰۰ کیشی اۉلیمیگه سبب بۉلگنی ایتیلگن بو هجومنی جوابسیز قالدیرگنی طالبان پاکستانگه قرشی اوروشده حربی کوچنی قۉلدن بېرگنی حقیده فکرلرنی توغدیرگن اېدی.
شو بیلن بیرگه، یقینده طالبان رهبری هبتالله آخوندزاده پاکستان طالبان تحریکی یا ده «تیتیپی»گه پاکستانگه قرشی هجوم قیلیشلریدن آگاهلنتیرگن خبر قیلینگن اېدی. بو هم اېسه طالبان اېندی پاکستان بیلن اوروشنی دوام اېتتریشگه تیار اېمسلیگینی بیلدیرهدی. بیراق پاکستان اېسه بو حرکتلرنی یېترلی بیلمهی طالباندن کۉپراق کفالت سۉرهیاتگنی کۉرینهدی.
خلاصه
پاکستان بیراز تنفسدن سۉنگ ینه بیربار خوست، کنر و پکتیکا ولایتلریده بیر قنچه هجوملرنی اویوشتیریشی، پاکستان و طالبان اۉرتهسیده تۉقنهشوولرنینگ ینگی بیر باسقیچگه آلیب چیقیشی ممکن دیر.
پاکستان و طالبان اۉرتهسیده مذاکرهلر نتیجه بېرمهگن بیرحالده همده طالبان، روسیه بیلن حربی-تخنیک کېلیشوویگه تهینیب، پاکستان بیلن ضدیتلرنی تیلگه آلگنیدن سۉنگ، بو هجوملر پاکستاننینگ طالبانگه قرشی ینگی باسیملری بۉلیشی ممکن و بو باسیملر و تۉقنهشوولر قندهیلیگی و قنچهلیک کوچلی بۉلیشی اېسه پاکستاننینگ کېینگی حرکتلری و پاکستان حرکتلریگه قرشی طالباننینگ جوابیگه باغلیق دیر.
پاکستاننینگ ینگی هجوملری ینه شونی کۉرسهتدی که طالبان رهبری تیتیپی پاکستانگه هجوم قیلمسلیگی اوچون بویروغ بېرگن بۉلسه هم بیراق پاکستان هلی طالبانگه ایشانمهگن و بو اۉرتهدهگی ضدیتلر دوام اېتیشی ممکن دیر.
شو بیلن بیرگه، اگرده پاکستان بو هجوملریگه مجبورلنتیرگن سببلردن بیری، طالباننینگ روسیه بیلن یقینلشیشی بۉلگن تقدیرده، افغانستان مسالهسی خصوصیده مملکتلر ارا رقابتلر ینگی بیر باسقیچگه باشلنگنی هم گماندن تشقری اېمس.
