تخار ولایتیدن اۉزبېک تیوی اختیاریگه قرار تاپکن معلوماتگه کۉره، بو ولایتنینگ اوچ یاش-ییگیت اهالیسی، طالبان تامانیدن شفقتسیزلیک بیلن اۉلدیریلگن.
منبعلرنینگ ایتیشیچه، تخار ولایتیده طالبان کوچلری بو ولایتنینگ خواجهغار اولسواللیگیده طلا کانیده ایشلهیاتگن اوچ ییگیتنی آتیب اۉلدیرگن.
ایتیلیشیچه، تخار ولایتینینگ دشتقلعه و خواجهغار اولسواللیکلری اهالیسی بۉلگن بو شخصلر ایکّی کېچه آلدین طالبان تامانیدن آتیب اۉلدیریلهدی. منبعلر معلوماتیگه کۉره، بو شخصلردن ایکّی کیشی خواجهغار اولسواللیگی یشاوچیسی اېکن که جسدلری اهالی تامانیدن آلیب قالینهدی و دشتقلعه یشاوچیسی بۉلگن ینه بیر یاش-ییگیت طالبان تالقانگه انتقال بېریلگندن سۉنگ جان بېرهدی.
ایتیلیشیچه، طالبان بو قضیهنی عامه ایچیده فاش اېتیلمسلیگی اوچون دشتقلعهلیک ییگیتنینگ هلمند یشاوچیسی اېکن دېب بو ولایتگه انتقال بېرهیاتگن چاغی، تخار کسلخانهسیده کېملیگی انیقلنیب اۉتگن کون توپراققه تاپشیریلهدی.
منبعلر، بو ییگیت آرقه قسمیدن اۉق تیککنی و قان کېتیشی عاقبتیده جان بېرگنینی قۉشیمچه قیلگن.
ایتیلیشیچه، خواجهغار اولسواللیگیده طلا کانیده طالبان بو ییگیتلرنینگ ایش جاییگه کېچه تاماندن باریب، اولرنی ناقانونی طلا ایشلب چیقریش عیبی بیلن حبسگه آلیشگه اورینهدی کېین اېسه طالبان تامانیدن توتقینگه آلینیشدن قاچیشگه اورینگن بو ییگیتلر اۉققه توتیلیب اۉلدیریلهدی.
حاضرگچه طالبان بو خصوصده هیچ نرسه دېمهگن.
