«افغانایواک» تشکیلاتی امریکا قۉشمه ایالتلری حکومتینی افغانستان باشپناه ایزلاوچیلرگه نسبتاً ایکّی تامانلهمه یاندشووده عیبلب، مملکت باشقه مهاجرلرنی آزیق-طعام و کییم-کېچک بیلن کوتیب آلهیاتگن بیر پیتده، افغانستانلیک اتفاقچیلرنی ییللر دوام اېتهدیگن بوروکراتیک جریانلر و عملگه آشمهیدیگن وعدهلر بیلن قرشی آلهیاتگنینی بیلدیردی.
افغان باشپناه ایزلاوچیلرینی امریکا قۉشمه ایالتلریگه کۉچیریش اوچون فعالیت یوریتهیاتگن «افغانایواک» تشکیلاتی باشلیغی شان وندایور پنجشنبه کونی (4-سرطان) اعلان قیلگن بیاناتیده بونی «تنلب مناسبتده بۉلیش» دېب اتهدی.
شان وندایور شوندهی دېدی: «بیر نېچه نسللر دوامیده امریکالیکلر، ناتجارت تشکیلاتلر، مذهبی جماعهلر و قَیته جایلشتیریش اگېنتلیکلری ینگی کېلگن عایلهلرگه حیاتلرینی قَیته قوریشنی باشلشلری اوچون ضرور احتیاجلرنی تأمینلشگه یاردم بېریب کېلگن: آزیق-طعام، کییم-کېچک، یاتاق انجاملری، حیات واسطهلری و برقرارلیک سری یۉل.»
بیراق اونینگ تأکیدلشیچه، امریکا قۉشمه ایالتلری اوردوسی و ادارهلری بیلن همکارلیک قیلگن افغانستان اتفاقچیلری «ییللر دوام اېتهدیگن موافقلیک تېکشیروولری، تکراري خوفسیزلیک نظارتلری و چېکسیز حجت بازلیک» بیلن کوتیب آلینماقده.
شان وندایورنینگ ایتیشیچه، مینگلب افغانستان اتفاقچیلریگه امریکا اولرنینگ یانیده بۉلیشی حقیده وعدهلر بېریلگن، اما بو وعدهلر حلی هم عملگه آشمهگن.
اونینگ قۉشیمچه قیلیشیچه: «مسأله جَنوبي افریقالیک قاچقینلرنینگ یاردم آلهیاتگنیده اېمس. مسأله شوندهکی، ترامپ مأموریتی اَیریم گروهلر اوچون مخصوص تنلنگن کوتیب آلیش پاکتینی تقدیم اېتیشگه تیار کۉرینهدی.»
«افغانایواک» باشلیغیگه کۉره، بو کوتیب آلیش سیاستی «عرق و تاریخ» اساسیده شکللنتیریلگن بۉلیب، افغانستاندهگی اوروش دوریده امریکا بیلن همکارلیک قیلگن اتفاقچیلرنی اېسه ناانیقلیک، کېچیکیش و قَیته جایلشتیریشدهگی تۉسیقلر بیلن یوزمه-یوز قالدیرماقده.
تشکیلات معلوماتلریگه کۉره، طالبان حاکمیتنی قَیته اېگهلهگنیدن کېین باشلنگن تخلیه دستوری آرقهلی حاضرگچه 200 مینگ کیشی افغانستاندن امریکا قۉشمه ایالتلریگه کۉچیریلگن.
شونگه قرهمهی، برچه قبول باسقیچلریدن اۉتگن ینه بیرمینگ 100 کیشی قطردهگی السیلیه لاگېریده امریکا قۉشمه ایالتلریگه کۉچیریلیشینی کوتماقده.
وندایورنینگ ایتیشیچه، ینه 250 مینگگه یقین امریکا اتفاقچیلری و اولرنینگ عایله اعضالری مهاجرت تیزیمی نینگ سېکین و چېکلنگنلیگی سببلی هنوز کوتیش حالتیده قالماقده.
او شوندهی دېدی: «بو آدملر امریکا اوچون بېگانه اېمس. اولر ترجمانلر، عسکرلر، دولت خدمتچیلری، ژورنالیستلر، گومانیتار یاردم خادملری و امریکا وعدهلریگه ایشانگن عایله اعضالریدیر. اولر نینگ کۉپچیلیگی بو وعدهلرگه عمل قیلیش یۉلیده کتّه شخصي خوفلرنی باشدن کېچیرگن.»
وندایورنینگ تأکیدلشیچه، امریکا قۉشمه ایالتلرینینگ باشپناه و مهاجرت سیاستی «برقرار مېزانلر، ملي خوفسیزلیک و بیز بیلن یانمه-یان خدمت قیلگن انسانلر آلدیدهگی مجبوريتلریمیز» اساسیده آلیب باریلیشی کېرهک.
او حاضرگی امریکا مأموریتی اَیریم قاچقینلرگه نسبتاً شاشیلینچ چارهلر کۉرهیاتگنی، اما امریکالیکلر بیلن بیرگه خدمت قیلگن افغانلرگه بوندهی مناسبت بیلدیرمهیاتگنیدن خواطر بیلدیردی.
«افغانایواک» تشکیلاتی باشلیغی شوندهی دېدی: «افغانستان اتفاقچیلری ساوغه پاکتلرینی سۉرهیاتگنی یۉق. اولر امریکادن فقط اۉز وعدهسیگه عمل قیلیشنی سۉرهماقده.»
اونینگ ایتیشیچه، افغانستانده قالهیاتگن ینه 250 مینگدن آرتیق آدم اولرگه وعده قیلینگن «امریکا آرزوسی»گه اېریشیش امکانیتینی کوتماقده.
بو آرهده امریکا قۉشمه ایالتلری جمهور رییسی دونالد ترامپ 2025-ییل باشیده آق اویگه قَیتگنیدن سۉنگ مهاجرت دستورلرینی تۉختهتیب قۉیدی و جاري ییلده افغانستان وطنداشلرینینگ اقشگه کیریشینی تۉلیق تعقیقلهدی.
اقش حکومتی حاضرده قطردهگی السیليه لاگېریده قالهیاتگن و باشپناه ایشلری کۉریب چیقیلهیاتگن مینگدن آرتیق افغانستانلیکنی کنگو دولتیگه یوباریشنی رېجهلشتیرماقده.
امریکا قۉشمه ایالتلری کانگرس اعضالری اېسه ینگی قانون لایحهسینی ایلگری سوریب، بو آدملرنینگ افغانستانگه قَیتریلیشی یاکه خوفسیز بۉلمهگن اوچینچی دولتگه کۉچیریلیشی نینگ آلدینی آلیشگه حرکت قیلماقده.
بیراق کانگرس تشبثی جاري ییل دسامبر آییگچه دوام اېتیشی ممکن، حالبوکه السیليه لاگېری سپتامبر آییده یاپیلیشی رېجهلشتیریلگن.
