ایران تشقی ایشلر وزیری عباس عراقچينینگ اَیتیشیچه، ایران و امریکا اۉرتهسیده امضالنگن کېلیشووگه موافق، هرمز بۉغازی ۳۰کون ایچیده ایران باشقرووی آستیده قَیته آچیلهدی و بونینگ تشکیلي ایشلری دوام اېتماقده.
ایران تشقی ایشلر وزیری بوگون (یکشنبه،۷سرطان) عراقلیک همکسبی بیلن اۉتکزگن قۉشمه مطبوعات انجمنیده مذکور شرطنامهگه کۉره، «بو مسألهده هېچ بیر باشقه تشکیلات یاکه دولت مسؤول اېمس»، دېدی.
عراقچي شوندهی دېدی: «بو جریانگه هر قندهی ارهلشوو یاکه ایران اسلام جمهوریتی عملگه آشیرهیاتگن ترتیبلردن تشقری ینگی یاکه علیحده میکانیزملرنی جاري اېتیشگه اورینیش وضعیتنی ینه-ده مرکّبلشتیرهدی، هرمز بۉغازینینگ قَیته آچیلیشینی کېچیکتیرهدی و کېسکینلیکنی آشیرهدی.
سۉنگّی ایکّی کېچهده هرمز بۉغازیده صادر بۉلگن حادثهلر هم کېسکینلیک و تۉقنهشوولرنینگ کوچهییشیگه آلیب کېلدی.»
او سۉزیده دوام اېتیب: «برچه تامانلردن هرمز بۉغازینی باشقریش و اونی قَیته آچیش بۉییچه ایران اسلام جمهوریتی کۉرهیاتگن چارهلرگه ارهلشمسلیکنی، امضالنگن کېلیشووگه رعایه قیلیشنی و اونینگ بېلگیلنگن یۉنهلیشیدن چېتگه چیقیشیگه یۉل قۉیمسلیکنی سۉرهیمن»، دېدی.
ایران و امریکا اوروشنی یکونلش بۉییچه پاکستان واسطهچیلیگیده امضالنگن کېلیشوودن سۉنگ، سۉنگّی ایکّی کېچهده بیر-بیریگه قرشی هجوملر اویوشتیردی.
امریکا ایراننی هرمز بۉغازیده بیر کېمه و بیر نفت تانکریگه هجوم قیلیشده عیبلب، بونگه جوابن ایراندهگی اَیریم نشانلرگه ضربه بېرگنینی معلوم قیلدی.
