بیرلشگن ملتلر تشکیلاتی ترقیات دستوری بغلان ولایتیده اوشبو تشکیلاتنینگ ماینلردن تازهلش گروهی تورر جای حویلیسیدن تاپیلگن۲۵ته پارتلهمهگن هاوان اۉقی ضررسیزلنتیرگنینی معلوم قیلدی.
تشکیلات بوگون (سهشنبه، ۲۳-سرطان) اعلان قیلگن حساباتگه کۉره،۱۲۲ملیمترلیک۲۵ ته هاوان اۉقی بغلان ولایتینینگ مرکزي بغلان اولسواللیگیده غلامبای قیشلاغیدن تاپیلیب، ضررسیزلنتیریلگن.
حساباتده ایتیلیشیچه، اوشبو اۉق-داریلر قولهب توشگن اوی قِسمینی قَیته قوریش ایشلری وقتیده انیقلنگن.
ایشچیلر قزیش ایشلری بیلن شغللنهیاتگن پیتده اولردن بیری نینگ کېتمانی قتّيق جسمگه تېککن. دستلب اولر بو کتّه تاش بۉلسه کېرهک، دېب اۉیلهگن. بیراق توپراق آلیب تشلنگچ، پارتلهمهگن هاوان اۉقلری تاپیلگن.
ایشچیلر محلي پولیسگه خبر بېرگچ، بیرلشگن ملتلر تشکیلاتینینگ ماینلردن تازهلش گروهی واقعه جاییگه یوباریلگن.
بغلاندهگی ماینلردن تازهلش گروهی هاوان اۉقلرینی ضررسیزلنتیرگچ، اولر ۱۹۸۰-ییللرده افغانستاندهگی سابق شوروی باسقینی دوریدن قالگن بۉلیشی ممکنلیگینی بیلدیرگن.
تشکیلاتی معلوماتیگه کۉره، اوشبو عملیات نتیجهسیده 8 نفر ایشچی ۱۶نفر عایله اعضاسی جان بېریش خوفیدن سقلب قالینگن.
سۉنگّی قیرق ییلدن آرتیق دوام اېتگن اوروشلر سببلی افغانستان ماین و پارتلهمهگن اۉق-داریلر بیلن اېنگ کۉپ افلاسلنگن دولتلردن بیری حسابلنهدی.
ماینلردن تازهلش بیلن شغللنووچی تشکیلاتلر معلوماتیگه کۉره، افغانستانده هر آی اۉرتهچه ۴۰-۵۰ کیشی، ییلیگه اېسه ۶۰۰- ۷۰۰ کیشی ماین و اوروشلردن قالگن باشقه پارتلهمهگن اۉق-داریلر پارتلشی عاقبتیده هلاک بۉلهدی یاکه جراحتلنهدی. اوشبو قربانلرنینگ ۷۰ فایزدن آرتیغینی بالهلر تشکیل اېتهدی.
