یقینده طالبان امر باالمعروف و نهی عن المنکر وزیری خالد حنفی بحثلی بیاناتلریدن بیریده «اۉزبېکستانده مسلمانلیک یالغیز تیللرده قالگن» دېب ادعا قیلگنی، کېنگ مناسبتلرنی اۉرتهگه آلیب کېلگن اېدی.
اوشبو بیانات تیزلیکده طالبان امر باالمعروف و نهی عن المنکر وزیرلیگی تامانیدن اوچیریلگن بۉلسهده بیراق، بو بیاناتگه نسبتن مناسبتلر دوام اېتدی.
حاضرگچه بو خصوصده، اۉزبېکستان حکومتی رسمی مناسبت بیلدیرگن اېمس. بیراق بو مملکت تشقی ایشلر وزیرلیگی سۉزلاوچیسی امانالله فیضیاف، مساله اۉزبېکستان اېلچیسی تامانیدن سۉرهشتیریلگنی بیراق حقیقت اېمسلیگینی اَیتگن.
فیضیاف بو مسالهنی اۉزبېکستانلیک ژورنالیست رحمان ارگنچ بیلن صحبتده اَیتگن.
کۉرینیشیچه، طالبان اۉزبېکستان اېلچیخانهسی ایضاح طلبیگه بو سۉزلرنی تصدیقلمهگن.
شونینگدېک، طالبان بو سۉزلر ناتۉغریلیگی و افغانستاننینگ ایچکی یېتکیرمهلری تامانیدن یاریتیلمهگنینی تیلگه آلگن.
ایتیش کېرهک که طالبان امر باالمعروف و نهی عن المنکر وزیرلیگی اوشبو سۉزلر کینگ مناسبتلرگه سبب بۉلهیاتگن بیر وقتده، تېزلیک بیلن بو وزیرلیک اجتماعی صحیفهلری و واتساپ گروپیدن اوچیرگن اېدی.
طالبان وزیرینینگ بو سۉزلریگه نسبتن مناسبت بیلدیرگن شخصلر اینیقسه افغانستانلیک اۉزبېک فعاللر، بو گروهنینگ افغانستاندهگی یاندهشوولریدن اېسلب، اۉزبېکستان ایچکی مسالهلریگه ارهلشمسلیگینی تاکیدلهدیلر.
