ایران یېتکرمهلری ترقتگن معلوماتلرگه کۉره، ایران رهبری مجتبی خامنهای «حزبالله»گه یۉلهگن مکتوبیده لبناننینگ حدودي یخلیتلیگینی سقلش و اسرایلنینگ اوشبو مملکتگه هجوملرینی تۉختهتیشنی امریکا بیلن اوروشنی یکونلشنینگ بیرینچی شرطی صفتیده بېلگیلهگن.
ایران یېتکرمهسی تیناوون (یکشنبه، ۴-اسد) «حزبالله» باش کاتبی و اعضالرینینگ «بیعتنامه» مکتوبیگه جوابن یازیلگنی ایتیلهیاتگن اوشبو مکتوبنی اعلان قیلدی.
مکتوبده خامنهای ایران اسلام جمهوریتی اوچون «حزبالله»نی قۉللب-قوّتلش استراتژیک سیاست اېکنینی تاکیدلهگن.
اونینگ یازیشیچه، ایران «لبان حدودي یخلیتلیگینی سقلش و صهیونیستی رژیم نینگ تجاوزینی تۉلیق همده هېچ قندهی شرطسیز تۉختهتیش»نی اقش بیلن اوروشنی یکونلش بۉییچه توزیلگن کېلیشوونینگ بیرینچی شرطی صفتیده ایلگری سورگن.
خامنهای «حزبالله»نی اسرایلگه قرشی جهادي گروهلر آرهسیده یېتکچی کوچ دېب اتهب، «جهاد و قرشیلیکدن باشقه یۉل قالمهگنینی» بیلدیرگن.
«حزبالله» نینگ سابق رهبری حسن نصرالله اوّلراق اوشبو سیاسي-حربي گروهنینگ برچه مالیوي و حربي تامیناتی ایران تامانیدن قاپلنیشینی بیر نېچه بار تاکیدلهگن اېدی.
ایران یېتکرمهلر اعلان قیلگن، «حزبالله» نینگ عملدهگی رهبری نعیم قاسمگه نسبت بېریلگن مکتوبده اېسه او مجتبی خامنهایگه بیعت بیلدیرگنی ایتیلهدی.
اساسن لبنان جَنوبی و اسرایل بیلن چېگرهداش حدودلرده فعالیت یوریتهدیگن «حزبالله» اوزاق ییللردن بویان اسرایل بیلن کېسکین قرهمه-قرشیلیکده. سۉنگگی پیتلرده اسرایل لبان جَنوبینینگ کتّه قِسمینی بامباردمان قیلیب، اَیریم حدودلرنی نظارتیگه آلگن.
ایران و امریکا اۉرتهسیدهگی اوروشنی یکونلش مقصدیده امضالنگن «اسلام آباد کېلیشووی» نینگ بیرینچی بندی لبانگه بغیشلنگن بۉلیب، اونده امریکا اسرایلنی هجوملرنی تۉختهتیش و لبان توپراغیدن چېکینیشگه مجبور اېتیشی لازملیگی قید اېتیلگن.
