بیرلشگن ملتلر تشکیلاتینینگ افغانستان بۉییچه انسان حقوقلری بۉییچه مخصوص گزارشگلری ریچارد بنت نیمروز چۉللریده ایرانگه ناقانوني یۉل آلگن 19 نفر افغانستان وطنداشینینگ هلاک بۉلیشیگه مناسبت بیلدیریب، آدملرنی بوندهی خوفلی و امیدسیز سفرلرگه مجبور قیلهیاتگن سببلرنی جدّي اۉرگنیشگه چقیردی.
بنت بوگون (شنبه، 10-اسد) ایکس اجتماعي ترماغیدهگی صحیفهسیده هلاک بۉلگنلرنینگ عایله اعضالریگه همدردلیک بیلدیردی.
او شوندهی یازدی: «بو دهشتلی فاجعه. افغانستانلیکلرنی بوندهی امیدسیز و خوفلی سفرلرگه مجبور قیلهیاتگن عامللرنینگ ایلدیزلریگه جدّي اعتبار قرهتیش ضرور.»
تخمیناً ایکّی هفته اوّل ایرانگه ناقانوني یۉل بیلن اۉتماقچی بۉلگن 19 نفر افغانستان وطنداشیدن عبارت گروه نیمروز ولایتی چۉللریده بېدرَک یۉقالگن اېدی.
اولرنینگ بېش نفری نینگ جسدی 25-سرطان کونی مارگو چۉلیدن تاپیلگن، قالگن 14 نفری نینگ جسدی اېسه اۉتگن هفته آخریده نیمروزدهگی لالو قوملی حدودیدن انیقلنگن.
افغانستانده قشّاقلیک و ایشسیزلیک نینگ کوچهییشی، شونینگدېک، ایران ویزهلرینی عادتي ترتیبده بېریش جریانی نینگ تۉختشی کۉپلب یاشلرنی ایش ایزلب ناقانوني یۉللر آرقهلی ایرانگه باریشگه مجبور قیلماقده.
بوندن اوّل هم ایرانگه ناقانوني یۉل آلگن افغانستان وطنداشلرینینگ هلاک بۉلیشی بیلن باغلیق کۉپلب حادثهلر قید اېتیلگن.
