طالباننینگ افغانستانده پشتون بۉلمهگن خلقلرگه نسبتن باسیملری دوام اېتر اېتکن، اخیرگی کونلرده، بو گروهنینگ عدلیه وزیری عبدالحکیم شرعی بیلن هزاره فعاللری اۉرتهسیدهگی جنجللر کېسکینلشگنیدن حقیده خبر بېریلماقده.
خبرلرگه کۉره، اوشبو کېلیشماوچیلیکلر طالبان عدلیه وزیری تامانیدن کابلنینگ اساسا هزارهلر یشاوچیسی بۉلمیش «امیدسبز» شهرچهسی بوشهتیلیشی خصوصیدهگی قراریدن سۉنگ کۉتریلگن.
طالبان ادعاسیگه کۉره، بو شهر دولتی یېرده قوریلگن بۉلیب، او یېردن جای ساتیب آلیب اوی قورگن شخصلر بۉشهتیشی درکار دیر.
هزاره قوم بویوکلری و دینی اربابلری اېسه بو قرارنی قبول قیلمهی طالباننینگ عدلیه وزیرینی هزارهلرگه نسبتن تعصبلی یاندهشووگه متهم قیلماقده.
بوندن آلدین، هزاره و شیعهلر بویوکلری بیر بیانات هم ترقهتیب، طالبان عدلیه وزیریدن اولرگه نسبتن یامان یاندهشوولرینی یکونلشینی سۉرهگن اېدی.
بو بیانات آرتیدن، طالبان هزاره بویوکلرینی اۉز ادارهسیگه چقیرگن بیراق اولر طالبان بو مقامینینگ حضوریگه باریشنی قبول قیلمهگن.
شو بیلن بیرگه، بو کېلیشاوچیلیک طالبان اۉرتهسیده هم جنجللرنی اۉرتهگه آلیب کېلگن.
خبرلرگه کۉره، طالبان ایچکی ایشلر وزیری سراجالدین حقانی، بو گروهنینگ عدلیه وزیری حرکتلریدن ناراضی دیر.
حقانینینگ اوشبو ناراضیلیگینی، طالبان ایچکی ایشلر وزیرلیگی اۉرینباسری محمدنبی عمری، هزاره بویوکلری بیلن اۉتکزگن اوچرهشووده تیلگه آلگنی ایتیلهدی.
