طالبلرنینگ عدلیه وزیری عبدالحکیم شرعي بو گروه تامانیدن «تارتیب آلینگن» و «دولتگه تېگیشلی» دېب اعلان قیلینگن یېرلرنی قَیتریش شرعي مجبوريت اېکنینی، بو جریان یېر اېگهلری و حاضرگی فایدهلنووچیلر نینگ ملتی یاکه مذهبیگه علاقهسی یۉقلیگینی ایتدی.
طالبلر عدلیه وزیرلیگی بوگون (سهشنبه، 20 اسد) اعلان قیلگن بیاناتده شرعي بو فکرلرنی تیناوون کابلده خیریه جمغرمهلری مسووللری بیلن اۉتکزیلگن اوچرهشووده بیلدیرگنی ایتیلگن.
شرعي شوندهی دېگن: «دولتگه تېگیشلی دېب اعلان قیلینگن تارتیب آلینگن یېرلر بۉییچه مخصوص محکمه قرارینی اجرا اېتیش یېرلرنی تارتیب آلیش نینگ آلدینی آلیش و تارتیب آلینگن یېرلرنی قَیتریش کمیسیونی نینگ شرعي و قانوني مجبورتی دیر».
اوشبو کمیسیونگه اۉزی رهبرلیک قیلهدیگن شرعي بوندن آلدین غزنی شهریدهگی هزارهلر استقامت قیلهدیگن نوآباد شهرچهسینی هم «دولتگه تېگیشلی» دېب اعلان قیلگن.
یقینده کابل نینگ غربیده جایلشگن هزارهلر یشهیدیگن «امید سبز» شهرچهسی اهالیسی اوچون اوی-جایلرینی بۉشهتیش تۉغریسیده قرار چیقریلگنیدن سۉنگ، طالبان اوشبو ایشلر بۉییچه ملتچیلیک اساسیده مناسبتده بۉلیشده عیبلنگن.
بیراق طالبان عدلیه وزیری «یېرلرنی تارتیب آلگنلر و ناقانوني اېگهللب آلووچیلر»دن تارتیب آلینگن یېرلرنی انیقلش و قَیتریش بوتون مملکت بۉیلب عملگه آشیریلهیاتگن حقوقي جریان اېکنینی ایتیب، «اونی ملت، مذهب و تیلگه باغلش منطق سیز» اېکنینی تأکیدلهدی.
اونینگ قۉشیمچه قیلیشیچه، محکمه یېرنینگ «دولتگه تېگیشلی» اېکنلیگی حقیده قرار چیقرگنیدن سۉنگ، کمیسیون اوشبو قرارنی قانوني و شرعي جهتدن اجرا اېتیشگه مجبور.
بو آرهده کابلدهگی امید سبز شهرچهسی اویلری و یېرلرینینگ اېگهلری اۉز یېرلرینی افغانستان جمهوریتی دوریده عملدهگی محکمه قراری اساسیده قانوني روشده ساتیب آلگنلیکلرینی اَیتماقده.
طالبلر تخمیناً ایکّی هفته آلدین امید سبز شهرچهسی اهالیسیگه اویلرینی بۉشهتیش اوچون اتیگی 10 کون – 15 اسدگچه مدت بېریلگنینی معلوم قیلگن.
شو وقت ایچیده شهرچهدهگی ملک اېگهلری طالبان عدلیه وزیری باشچیلیگیدهگی کمیسیون، اوشبو گروهنینگ ایچکی ایشلر وزیرلیگی و حتا طالبلر رهبری ملا هبتالله نینگ ادارهسیگه هم مراجعت قیلگن. بیراق اولر ایشنی قَیته کۉریب چیقیش بۉییچه ایجابي جواب آلمهگن. طالبلرعدلیه وزیری اېسه هنوزگچه شهرچهنی بۉشهتیش و دولتگه قَیتریش حقیدهگی قرارنی اجرا اېتیشنی طلب قیلماقده.
طالبلر امید سبز شهرچهسیدهگی بیر مینگ مینگ 500 جریبدن آرتیق یېرنی دولتگه تېگیشلی دېب اعلان قیلگن.
