بیرلشگن ملتلر تشکیلاتی ترقیات دستوری افغانستانده مالی منبعلردن فایدهلنیش امکانیتی ایش و کوچ آلدیدهگی «کتّه تۉسیق» اېکنینی ایتدی.
اوشبو تشکیلات بوگون (پنجشنبه،۱۲-سنبله) نشر قیلگن گزارشیده کیچیک تجارتلر، اینیقسه، عیاللر تدبیرکارلیگینی ضرور مالی منبعلر بیلن تأمینلش مقصدیده «تضمین اعتبار» دستورینی یۉلگه قۉیگنینی معلوم قیلدی.
بیرلشگن ملتلر تشکیلاتی ترقیات دستورینینگ ایتیشیچه، «تضمین اعتبار» دستوری کریدیتورلرگه، خصوصاً، بانکلرگه 23 مینگ ۷۰۰دن آرتیق کیچیک و اۉرته بیزنسگه کریدیت اجرهتیشده یاردم بېرگن. نتیجهده ۴۷مینگدن آرتیق کیشی اوچون ایش اۉرینلری یرهتیلگن.
۲۰۲۴ییلده ایشگه توشیریلگن اوشبو دستور۷۱ میلیون دالردن آرتیق خصوصي سرمایهنی سفربر قیلگن.
بیرلشگن ملتلر تشکیلاتی ترقیات دستورینینگ لایحه مدیری ابراهیم تومبی اوشبو دستورنی اصلیده «خوفنی بۉلیشیش» میکانیزمی دېب اتهگن.
اونینگ ایتیشیچه، بیرلشگن ملتلر تشکیلاتی ترقیات جمغرمهسی تامانیدن بېلگیلنگن مېزانلر اساسیده خصوصي سکتور و بانکلرگه بیزنس-رېجهسی همده تدبیرکارلیککه اشتیاقی بار، بیراق دستلبکی سرمایهگه اېگه بۉلمهگن یاشلرنی قۉللب-قوّتلش اوچون ایشانچ بېریلهدی.
«کریدیت کفالتی» دستوری آرقهلی بانکلر «اۉسیش صلاحیتی»گه اېگه بیزنسلرگه کریدیت اجرهتیشگه رغبتلنتیریلهدی.
بیرلشگن ملتلر تشکیلاتی ترقیات دستوری اوشبو تشکیلات دستورلری دایرهسیده قۉللب-قوّتلنهیاتگن تجارتلرنینگ اکثریتی عیاللر باشچیلیگیدهگی کیچیک و اۉرته تجارتلر اېکنینی بیلدیردی.
تشکیلاتنینگ ایتیشیچه، افغانستانده میلیونلب عیاللر اوچون تجارت باشلش اۉیلب کۉریلهدیگن سۉنگگی درآمد منبعلریدن بیری بۉلیب قالهیاتگن بیر پیتده، بیرلشگن ملتلر تشکیلاتینینگ قۉللب-قوّتلش دستورلری اولرگه بوندهی فعالیت بیلن شغللنیش امکانینی بېرماقده.
تشکیلات معلوماتیگه کۉره، بیرلشگن ملتلر تشکیلاتی ۲۰۲۱–۲۰۲۵-ییللر آرهلیغیدهگی تۉرت ییل دوامیده ۸۹ مینگته رسمي و نارهسمي تجارتنی قۉللب-قوّتلهگن. اولرنینگ ۹۱فایزی، یعنی قریب ۸۱مینگته تجارت عیاللر تامانیدن باشقریلهدی.
بو حالت طالبلر افغانستان اوستیدن نظارتنی قۉلگه آلگنیدن سۉنگ عیاللرنی تعلیم آلیش و دولت همده خصوصي تشکیلاتلرده ایشلشدن چېکلهگن بیر پیتگه تۉغری کېلماقده.
بیرلشگن ملتلر تشکیلاتی کۉمهگیده، شونینگدېک، بانکلر و باشقه تشکیلاتلرنینگ کریدیت دستورلری آرقهلی یۉلگه قۉییلگن بیزنسلر اساسهن خصوصي و اوی شرایطیدهگی فعالیتلردن عبارت. جملهدن، عیاللر کۉپراق تیکووچیلیک، سوت و سوت محصولاتلرینی قَیته ایشلش، کلچه کبی شیرینلیکلر تیارلش، قیشلاقلرده پرنده باقیش و کیچیک سبزهواتچیلیک ایکینلری بیلن شغللنماقده. اَیریم حاللرده اېسه اولر قوروق مېوهلرنی قَیته ایشلش، ساتیب آلیش و ساتیش فعالیتیگه هم کیریشگن.
