مین افغانستان نینگ شمالیده تۉغیلیب-اوسگن، اۉزبېک تیلیده ایجاد قیلگن و ییللر دوامیده ژورنالیست صفتیده شو جمعیت نینگ واقعهلرینی یاریتگن انسانمن. شو نینگ اوچون اۉزبېک تیلی نینگ جماعت حیاتیدهگی اۉرنیگه تهدید سالیشی ممکن بۉلگن هر قندی اوزگریشگه مین عادی کۉزهتووچی صفتیده قرهآلمهیمن.
مین اوچون بو مسأله شخصی.
یقینده فاریاب بیلیم یورتیده اۉزبېک تیلیدهگی لوحهلر آلیب تشلنگنی یازولر اۉچیریلگنی حقیده خبرلر ترقلماقده اېکن حاضرچه بونینگ سببی بوییچه بیلیم یورت یاکه تیگیشلی ادارهلرنینگ انیق رسمی ایضاحی آچیق منبعلرده کۉرینمهیدی اما بو حالتنی باشقه واقعهلردن بوتونلهی اجرهتیب قرهش هم قیین.
سونگگی ییللرده جوزجان و سمنگان کبی شمالي حدودلردهگی ایریم عالی تعلیم مؤسسهلریده هم اۉزبېکچه یازوولرنینگ آلیب تشلنگنی یاکه اوزگرتیریلگنی حقیده خبرلر بیریلدی. ایریم حاللرده ناراضیلیکلردن سونگ اۉزبېکچه یازوولر قیته تیکلنگن.
مین ژورنالیست صفتیده بیر نرسهنی انیق ایتهمن: اۉزبېکچه یازوولر حلی بوتون سیاست نینگ اثباتی اېمس. اما تکرارلنهیاتگن حالتلر حقیده سوال بیریش ژورنالیستنینگ بورچیدیر.
بو مین اوچون نیمهنی انگلتهدی؟
مین اۉزبېک تیلینی فقط اویده گپلشیلهدیگن تیل دیب بیلمهیمن، بو مینینگ خلقیم نینگ آوازی.
بو تیلده آدملر اوز دردینی ایتگن، شعر یازگن، تاریخینی سقلهگن، فرزندلریگه اۉزلیگینی اورگتگن.
مین ییللر دوامیده میکروفون قرشیسیده، تلویزیون دستورلرده و مطبوعاتده اۉزبېک تیلیده گپیردیم. شو نینگ اوچون بیلیم یورت دیواریدهگی بیرگینه اۉزبېکچه یازوو نینگ یوقالیشی هم مین اوچون عادی ماموری اوزگریش اېمس.
چونکه تیل اول لوحهلردن یوقالهدی، کیین تعلیمدن، کیین عامهوی اخبارات واسطهلریدن و نهایت آدملرنینگ کوندهلیک حیاتیدن سیقیب چیقریلیشی ممکن.
تاریخنی هم اۉچیریب بۉلمهیدی، افغانستان نینگ تورکی و اۉزبېک تاریخینی هم سیاسی قرارلر بیلن چیتگه سوریب بۉلمهیدی.
علیشیر نوایی، ظهیرالدین محمد بابر و تورکی ادبیاتنینگ باشقه بویوک نمایندهلری بو حدود تاریخینینگ اجرهلمس قسمی دیر. اولر نینگ میراثی بیر گروه نینگ شخصی ملکی اېمس، افغانستان نینگ کوپ قتلملی تاریخی خزینهسی دیر.
مین شونی اونوتمسلیک کېرهک دیب حسابلهیمن: تیلگه حرمت خلقنینگ موجودلیگینی تن آلیشدیر. تاریخگه حرمت جمعیتنینگ خاطرهسیگه حرمتدیر.
شونینگ اوچون مین اۉزبېک تیلینینگ تعلیم، دولت و جماعت مکانیدهگی اۉرنینی اساسسیز روشده چیکلهیدیگن هر قندی قرار یاکه حرکتنی قطعیاً قارهلهیمن.
مین افغانستانده پشتو، دری، اۉزبېک و باشقه تیللر بیر-بیریگه رقیب اېمس، تینگ حقوقلی مدنی بایلیک صفتیده کوریلیشینی ایستایمن.
چونکه افغانستاننی فقط بیرته تیل بیلن توشونتیریب بۉلمهیدی.
مین اوچون اۉزبېک تیلینی حمایه قیلیش بیر تیلنی حمایه قیلیشدن کوره کتّهراق مسأله بو مینینگ خلقیمنینگ آوازینی، تاریخی خاطرهسینی و اۉزلیگینی حمایه قیلیشدیر و بو آواز یۉقالمسلیگی کېرهک.
