بوگون آلمان پارلمانیده اۉتکزیلگن ییغینده فعاللردن فروزان خلیلیار، افغانستانده اۉزبېکلر احوالی و اولر دوچ کېلهیاتگن وضعیت حقیده صحبت قیلیب، بو خصوصده آلمان پارلمانینینگ اعضالری بیلن معلوماتلرنی شریک قیلگن.
خانم خلیلیار، افغانستانده اۉزبېکلر دوچ کېلگن وضعیت اینیسقه یقینده فاریاب بیلیم یورتیده اۉچیریلگن لوحهلر مسالهسی، عیاللر احوالی، مجبوری کۉچیریشلر و شونگه اوخشش باشقه عدالتسیزلیکلر حقیده تۉختهلگن.
خانم خلیلیار صحبتلریدن بیر قسمیده شوندی دېدی: « اۉزبېکلر یشهیدیگن حدودلرده، اینیقسه افغانستاننینگ شمالیده، مجبوری کۉچیریش، یېر و اویلرنی تارتیب آلیش همده عایلهلرنی اۉز یېرلریدن هیدهب چیقریش حالتلری حقیده خبرلر بېریلگن. بو شونچهکه بیر پرچه یېرنی تارتیب آلیش اېمس؛ آدملرنی یېری و اوییدن اوزاقلشتیریش آرقهلی اصلیده بیر جمعیتنینگ ایلدیزلری نشانگه آلینهدی.
خانم خلیلیار شونینگدېک دوام اېتگن: ینه بیر مساله اۉزبېک تیلی و اۉزبېک ملي اۉزلیگی. افغانستاننینگ اۉزبېکلر اېنگ کۉپ یشهیدیگن مهم حدودلریدن بیری بۉلگن فاریابده اۉزبېک تیلینینگ تعلیم و بیلیم یورتیدهگی موقعی چېکلنگن. مېنینگ سوالیم شو که بیر ملتنینگ اۉز آنه تیلینی بیلیم یورتی و تعلیم تیزیمیده سقلشگه حققی یۉقمی؟»
بو مجلسده، آلمان پارلمانی اعضالریدن شاهینه گمبیر، افغانستانده اۉزبېکلر حقوقلری بۉزیلیشی خواطرلی اېکنینی تاکیدلب، بو وضعیت اولرنینگ کېلهسی پروتکللریده اعتبارگه آلینیشینی بیلدیرگن.
شونینگدېک، مجلسده اشتراک اېتگن فعاللردن ینه بیری فرنگیس سوگند، افغانستان اینیقسه عیاللر احوالی حقیده گپیرگن.
ییغینده، آلماندهگی افغانستانلیک مهاجرلر احوالی هم محاکمه قیلینگن
