فرنگیس افغانستاندهگی خاتین ژورنالیست نینگ یسمه آتی. اونینگ خوفسیزلیگی و شخصی حیاتینی حمایه قیلیش مقصدیده اوشبو حکایهده آتی و ایریم تفصیلاتیلر اۉزگرتیریلگن.
پنجشنبه کونی اېدی. رسمی ایش وقتی توگهگن، مېن و همکسبلریم باشقه کونلردېک تحریریتدن چیقیب کېتدیک. هېچ بیریمیز بو ییرگه ایشلهیاتگن آخرگی کونیمیز بۉلیشی و ینه بیر تام آستیده ییغیله آلمسلیگیمیزنی بیلمسدېک.
اۉشه کونلرده ولایتلرنینگ قولشیگه تېگیشلی خبرلرنی کوزهتیب باردیک. هرکونی ینگی خبرلر کېلر، خواطرلر اېسه تاباره آرتردی. شونگه قرهمهی، ایشیمیز دوام اېتردی. میزلریمیزگه اۉتیریب، خبرلر و دستورلر تیارلردیک.
بیراق اۉشه پنجشنبه مېنینگ عامهوی اخبارات واسطهسیدهگی سۉنگّی ایش کونیم بۉلدی. مېدیا عالمیگه کیرگنیمدن بېری بو ایشنی یخشی کۉرردیم. مېدیا مېن اوچون شونچه که بیر وظیفه اېمس، بلکه آدملر بیلن ملاقات قیلیش نینگ بیر یۉلی اېدی. بو یېرده تورلی خیل انسانلر، هر بیری نینگ ایتیشگه ارزیگولیک اۉز حکایهسی بار بۉلگن آدملر بیل سۉزلشیشم ممکن اېدی.
دستلبکی کونلرده میکرافوننی قۉلیمگه آلگنیمده، قۉرقردیم: کمرهدن، آدملرنینگ قضاوتیدن و حتی سېسیم قندهی اېشیتیلیشیدن هم. بیراق، سېکین-سېکین قۉرقویم آزهیدی. هر سفر میکرافون قرشیسیگه چیققنیمده، اۉزیم سېوگن ایشیمگه ینه بیر آدیم یقینلشگندېک بیلردیم.
مېن اوچون هر بیر ریپورت یا گزارش شونچه که بیر موضوع اېمس اېدی. هر بیر گزارش آرتیده بیر انسان نینگ حیاتی و حکایهسی بار اېدی. ایشم نینگ عینا شو قسمینی اېنگ کۉپ یخشی کۉرردیم: آدملر بیلن سۉزلش، اولرنینگ سۉزلرینی تینگلش و حیاتلری نینگ بیر قسمینی حکایه قیلیب بېریش.
تورلی موضوعلر آرهسیده خاتینلر حیاتی مېن اوچون کۉپراق اونوملی و مهم اېدی. کۉپ مرته ییللر دوامیده اۉز معمالرینی ایچیده آلیب یورگن، بیراق حیاتی و قیینچیلیکلری حقیده سۉزلش اوچون کمدن-کم امکان تاپگن خاتینلر بیلن سۉزلشگنمن.
حساباتیمده بیر خاتین نینگ سېسینی عکس اېتتیرگنیمده، ایشیم شونچه که بیر نېچه جمله یازیشدن عبارت اېمسلیگینی سېزردیم. مېن اونینگ حکایهسینی، احتمال، هېچ قچان بوندهی معمالرگه یقیندن دوچ کېلمهگن انسانلر نینگ قولاغیگه یېتکزیشنی ایستردیم.
بیراق اۉشه پنجشنبه اوی کونی همه نرسه اۉزگردی.
بیر نېچه آی اۉتگچ، مېدیا ساحهسیدهگی ایشیمگه قیتیش اوچون امکانیت تاپیلدی. ایشیمنی ینه دوام اېتتره آلیشدن اومیدیده قیتدیم، بیراق شرایط ایلگریدېک اېمس اېدی. چېکلاولر کۉپهیگن، موضوعلرنی تنلشده و حتی دستورلرده ایتیلهدیگان سۉزلر هم ینهده احتیاطکار بۉلیشیمیز کېرهک اېدی.
ایلگری عادی بۉلگن کۉپلب نرسهلر اېندی آسان اېمسدی. ایستهگن موضوعنی اېرکین تنلهی آلمسلیک یاکه هر بیر گزارشنی اۉزیمیز ایستهگندېک تیارلهی آلمسدیک.
شونگه قرهمهی، ایشیمنی دوام اېتتیریشنی ایستردیم. مېدیا حقیده اۉیلهگنیمده ،ایچیمده اۉشه اېسکی تویغو ینه جانلنردی. آدملر بیلن سۉزلشیش و اولرنینگ حکایهلری حکایه قیلیب بېریشیم ممکنلیگی حقیدهگی تویغو.
بیراق، اقتصادی معمالر هم تاباره کوچهیدی و آخر-عاقبتلر مېدیا ساحهسیدهگی فعالیتیم ینه تۉختهدی.
مېن ینه اویگه قیتدیم.
اوی مېن اوچون خوفسیز جای اېدی. بیراق، اویده اۉتیریش مېن اۉرگنیب قالگن نرسه اېمس اېدی. ایلگری ایش، سۉزلش و گزارش تیارلش بیلن اۉتگن کونلر اېندی انچه ساکن و اوزاقراق تویولردی. کېلهجگیم حقیده ایلگریدن کۉپراق اۉیلردیم و اۉزیمدن: «نخادکه بو سفر همهسی حقیقتدن هم توگهگن بۉلسه؟» دېب سۉرردیم.
ینه ایش بیلن بند بۉلیش اوچون روزمهمنی خصوصی مکتلردن بیریگه آلیب باردیم. یخشیمکه، اۉقووتوچی صفتیده ایشگه قبول قیلیندیم. اۉقووتوچیلیک مېنگه ینه آدملر بیلن ملاقات قیلیش امکانینی بېردی و کونلریم باشقه بیر شکلگه کیردی. بیراق، خیالیمده بیر سوال همان بار اېدی: «ینه مېدیا ساحهسیگه قیتهمن می؟»
بیراز وقت اۉتگچ، ژورنالیستلر اوچون تشکیل اېتیلگن مخصوص دستورگه رۉیخطدن اۉتدیم. ینه مېدیا ساحهسیده ایشلش امکانیتیگه اېگه بۉلیشنی ایستردیم. بو امکانیت مېنی دایما سېویب کېلگن ایشیمگه قیتریشگه اومید قیلردیم.
نهایت، بیر کونی قبول قیلینگنیم حقیدهگی الکترون خط کېلدی. مېن قبول قیلینگن اېدیم.
بیر نېچه لحظه شونچه که سکیرینگه قرهب قالدیم. اوزاق وقت کوتگن امکانیتیم ینه حیاتیمگه قیتگنیگه ایشانه آلمسدیم.
آنمگه ایتگن بیرینچی گپیم: «مېن موفقیتگه اېریشدیم.»
مېن اوچون شونچه که بیر دستورگه قبول قیلینیش اېمس اېدی. اوزاق وقتدن کېین ینه اۉزیم سېوگن ایشیم سری یۉل آچیلگندېک حس قیلردیم. مېن بو یۉل بلکه بوتونلهی یاپیلیب قالگن دېب اۉیلهگندیم.
ینه گزارش تیارلشیم و خاتینلر بیلن سۉزلشیشیم ممکنلیگینی بیلگنیمده، خیالیمگه کېلگن بیرینچی سوال شو بۉلدی: «قهیېردن باشلهیمن؟»
خیالیمده جوده کۉپ موضوعلر و تیمالر بار اېدی. اقتصادی و اجتماعی معمالرگه دوچ کېلهیاتگن خاتینلر، چېکلاولرگه قرهمهی، حیاتلرینی دوام اېتتیریشگه حرکت قیلهیاتگن خاتینلر حقیده حکایهلر بار اېدی.
قیسی بیرینچی بۉلیب یاریتیشنی بیلمسدیم. بیراق، بیر نرسهنی یخشی بیلردیم: ینه سېسی کمراق اېشیتیلهدیگان، اۉز حکایهسینی ایتیش امکانیتی کم بۉلگن خاتینلر حقیده یازیشنی ایستردیم.
قیتهیاتگنیمدن کېین ایلک گزارشم خاتینلر حقیده بۉلدی. ینه گزارش تیارلش اوچون اۉتیریش، سواللر بېریش، بیر خیاتین نینگ سۉزلرینی تینگلش و اونینگ حکایهسینی یازیب آلیش مېن اوچون شونچه که کوندهلیک ایش اېمس اېدی.
اۉزیمنی ینه ییللر دوامیده حیاتیم نینگ بیر قسمی بۉلگن یېرگه قیتگندېک حس قیلدیم.
ینه بیر مرته مېدیا ساحهسینی نېگه سېوگنیمنی توشوندیم
اۉزیمگه شوندهی دېدیم: «اېندی خاتینلرنینگ حکایهلر و قیغولر جیملیکده قالیشنی ایستهمیمن. اولرنینگ سېسی اېشیتیلشینی ایستهیمن.»
قیتیش یۉلیم مېن اوچون آسان بۉلمهدی. بیر مرته ایشیمنی یۉقاتدیم، ینه باشلهدیم و ینه تۉختهدیم. بیر مدت ینه اویده قالدیم و کېلهجگیم حقدیه اۉیلهدیم. بیراق، مېدیا ساحهسیگه بۉلگن قیزیقیشیم هېچ قچان سۉنمهدی.
بوگون ینه بیر وقتلر مېندن بوتونلهی تارتیب آلینگن دېب اۉیلهگن ایشیمگه قیتدیم.
حلی آلدینده تورگن یۉل آسان اېمس. بیراق، اېندی ینه قلمیم و سېسیم قۉلیمده. مېن اولردن سېسی آزراق اېشیتیلگن خاتینلر نینگ حیاتینی حکایه قیلیش اوچون فایدهلنماقچیمن. قیینچیلیکلرگه قرهمهی، حیاتینی دوام اېتتیریشگه حرکت قیلهیاتگن خاتینلر نینگ حکایهلرینی یېتکزماقچیمن.
اېنگ کتته ایستهگیم-بیر کون کېلیب افغانستان خاتینلری اېرکین یشهی آلیشلری، تعلیم آلیشلری، ایشلری، اۉزلری تنلاو قیلیشلری و تیلکلریگه اېریشیش اوچون حرکت قیله آلیشلری دیر.
اگر باشقه خاتینلرگه بیرار گپ ایتیشیم کېرهک بۉلسه، بو شوندهی بۉلردی: «هېچ قچان اومیدینگیزنی اوزمنگ. بعضا عینا اومیدسیزلیک نینگ اېنگ یوقاری چۉققیسیده ینگی بیر یۉل آچیلهدی.»
مېن هم بیر وقتلر مېدیا ساحهسیگه بارهدیگان یۉلیم یاپیلگن دېب اۉیلهگندیم. بیراق، بوگون ینه اونگه قیتدیم.
اۉشه پنجشنبه کونی مېدیا ساحهسیدن یاپیق اېشیک قرشیسیده چیقیب کېتدیم. بوگون اېسه اوزاق وقتدن سۉنگ ینه بیر دریچه آچیلدی. بو سفر مېن اوندن اۉتیب کېتماقچینمن.
