طالبلرنینگ ننگرهار ولایتیدهگی محلي رسميلری چپرهار اولسواللیگیده یېر مسألهسی یوزهسیدن ایکّی عایله اۉرتهسیده کېلیب چیققن تۉقنهشوو عاقبتیده تۉرت کیشی هلاک بۉلگنی و ینه اوچ کیشی یرهلنگنینی معلوم قیلدی.
طالبلرنینگ ننگرهاردهگی امنیه قوماندانی سۉزلاوچیسی سید طیب حمادنینگ ایتیشیچه، اوشبو حادثه بوگون (شنبه، ۲۱-سنبله) چپرهار اولسواللیگیگه قرهشلی «زغو» قیشلاغیده یوز بېرگن.
او هلاک بۉلگنلرنینگ قَیسی تامان آدملری اېکنی یاکه قربانلر هر ایکّی تاماندن بۉلگن-بۉلمهگنینی انیقلشتیرمهگن.
حمادنینگ ایتیشیچه، طالبلر کوچلری واقعه جاییگه یېتیب باریب، یرهدارلرنی شفاخانهگه آلیب کېتگن و حادثه یوزهسیدن ایکّی کیشینی حبسگه آلگن.
اونینگ بیلدیریشیچه، حادثه بۉییچه تېرگاو دوام اېتماقده و حبسگه آلینگنلر عدلیه و قضایی اۉرگانلریگه تاپشیریلهدی.
وقتی-وقتی بیلن ولایتلرده شونگه اۉخشش اۉلیم بیلن یکونلنگن تۉقنهشوولر حقیده خبرلر ترقهلهدی. ماجرا و نزاعلرنی اۉز وقتیده همده عدالتلی حل قیلمسلیک بوندهی تۉقنهشوولرنینگ سببلریدن بیری صفتیده کۉرسهتیلهدی.
