اندونزیاده جاوه دېنگیزیده ۲۴۳ نفر یۉلاوچیسی بۉلگن یۉلاوچی کېمهسی چۉکیب کېتدی. حاضرگچه کېمه یۉلاوچیلریدن ۱۰۳ نفری تاپیلگن، قوتقرووچیلر ینه ۱۴۰ کیشینی قیدیرماقده.
رویترز خبریگه کۉره، قوتقریب آلینگن ۱۰۳ کیشیدن بیر نفری هلاک بۉلگن.
اندونزیانینگ قیدیروو و قوتقروو اگېنتلیگی مملکتدهگی ۲۴۳ نفر یۉلاوچیسی بۉلگن یۉلاوچی کېمهسی یکشنبه تانگیده ناقولهی آب-هوا شرایطیده علاقه اوزیلگنیدن سۉنگ بېدرَک یۉقالگن دېب خبر بېریلگنینی معلوم قیلدی.
خبرگزارلیکنینگ بیلدیریشیچه، «ویرگو ترانسپورت ۸» کېمهسی شنبه کونی شرقي جاوهدهگی جَنوبي کالیمانتاندهگی بانجارماسین شهریگه یۉل آلگن.
خبرگزارلیک یکشنبه کونی کېینراق کېمهنینگ چۉکیب کېتگنینی معلوم قیلدی، بیراق قۉشیمچه تفصیلاتلر کېلتیرمهدی.
خبرگزارلیکنینگ بانجارماسیندهگی بۉلیمی رهبری ای پوتو سودایانا ویدیومراجعتیده ۱۰۳کیشی تورلی کېمهلر یاردمیده تخلیه قیلینگنینی و اولرنینگ اَیریملری شرقي جاوهدهگی پورتلردن بیریگه آلیب باریلیشینی ایتدی.
اونینگ سۉزلریگه کۉره، قوتقرووچیلر قیدیروو ایشلرینی باشلهگن و بیر گروه، بیر نېچته کېمه همده بیرته تیک اوچر یۉلاوچی کېمهسینینگ معلوم بۉلگن سۉنگگی جایلشوویگه یوباریلگن.
اندونزیا کۉپلب آراللردن تشکیل تاپگن مملکت بۉلیب، ترانسپورت اوچون یۉلاوچی کېمهلریگه کتّه درجهده تهیهنهدی. چونکه دېنگیز یۉللری هوا ترانسپورتیگه قرهگنده ارزانراق و قولهیراق حسابلنهدی.
بیراق خوفسیزلیک ستندردلری هر دایم هم قطعي بجریلمهیدی. شو سببلی مملکتده بختسیز حادثهلر سانی نسبتاً یوقاری.
