یېتی یاشلی صالحه آنهسی یانیده اۉتیریبدی؛ او آنهسی نینگ یوزینی، اویینی و اطرافیدهگی دنیانی کۉریش امکانیدن محروم بۉلگن قیزغلاق. او بالهلرچه سۉزلر بیلن کۉزلرینی دولهتیش حقیده سۉزلهیدی؛ احتمال، بیر کون کېلیب ،باشقهلر کۉرهیاتگن نرسهلرنی اۉزی هم کۉریشگه اومید قیلهدی.
اونینگ آنهسی ،30 یاشلی ریحانه عبیدی، ایکّی فرزند نینگ آنهسی. اۉرته مخصوص تعلیمگه اېگه بۉلگن ریحانه محلی و خلقارا تشکیلاتلرده ایشلهگن. بیراق جاری ییل باشیدن باشلب افغانستانگه خلقارا همجمعیت تمانیدن اجرهتیلگن یاردم نینگ کمهییشی همده تشکیلاتلرده ایشلهیدیگن خاتینلرگه نسبتا چېکلاولر نینگ کوچهیشی سببلی او ایشیدن ایریلگن.
ایشسیز قالگچ، او ینه آتهسی نینگ اوییگه قیتگن. اونینگ ایتیشیچه، بو یېرده اقتصادی معمالر دوام اېتماقده.
ریحانه شوندهی دېدی: «شو وقت دوامیده تورلی تشکیلاتلر بیلن ایشلب، روزغاریم اوچون ضرور مبلغنی تاپیب کېلردیم. بیراق، بو رېجهلر هم تۉختب قالدی و اقتصادی معمالریم ینهده کوچهیدی.»
بیراق ایشدن ایریلیش ریحان نینگ حیاتیدهگی معمالردن فقط بیری دیر.
طالبان حاکمیتگه قیتگن دستلبکی کونلرده، ریحان نینگ تورموش اۉرتاغی افغانستاننی ترک اېتیشگه قرار قیلگن. اۉشندن بېری عایلهسی بیلن علاقه اوزگن. حاضر اېسه ایکّی فرزندی نینگ تامیناتی و تربیهسی ریحان نینگ ذمهسیده.
او دوچ کېلهیاتگن برچه معمالر آرهسیده ریحاننی اېنگ کۉپ تشویشگه سالهیاتگن مسله یېتی یاشلی قیزی نینگ احوالی دیر.
او صالحهگه اشاره قیلیب شوندهی دېدی: «اگر امکانم بۉلگنیده، کۉزلریمنی قیزیمگه بېرردیم، تاکه اونینگ کۉزلری ینه کۉرسین و او هم نرسهنی کۉره آلسنی.»
ریحان نینگ ایتیشیچه، قیزی نینگ کۉز کسللیگینی دوالش ممکن. بیراق عایله نینگ مادی احوالی آغیرلیگی سببلی صالحه اۉز وقتیده ضرور دوالهنیش امکانیگه اېگه بۉله آلمهگن.
ریحانه نینگ آنهسی هم قیزی نینگ حیاتی حقیده شونگه اۉخشش واقعهنی سۉزلب بېرهدی. اونینگن ایتیشیچه، هر قندهی انه کبی او هم قیزی تورموشگه چیققچ، بختلی حیات کېچیریشینی آرزو قیلگن. بیراق، ریحانه نینگ حیاتی بو آرزولردن بوتونلهی باشقهچه کېچگن.
اونینگ ایتیشیچه، ریحان عایلهدهگی بېشینچی فرزند و عایله نینگ هم مادی احوالی یخشی اېمس.
حاضر آنه و قیز نینگ ایستهگی بیر: صالحهنی دوالهتیش اوچون امکان تاپیش.
بو عایله کمبغللیک و اقتصادی معمالر دوالهنیش امکانیتیدن محروم بۉلهیاتگن یگانه عایله اېمس.
بیرلشگن ملتلر تشکیلاتی 2024 ییل جولای آییده اعلان قیلگن حساباتیده افغانستاندهگی کۉرلیک دوالهنیش ممکنلیگینی معلوم قیلگن. بیراق، اقتصادی قیینچیلیکلر و ساغلیقنی سقلش تیزیمیدهگی معمالر ایریم انسانلر نینگ کۉری قابلیتینی تیکلش اوچون ضرور دوالهنیشنی آلیشگه تۉسقینللیک قیلماقده.
صالحه اوچونو بو معما کوندهلیک حیاتی نینگ بیر قسمیگه ایلنگن. او حالی یاش باله بۉلسه-ده، کۉزلرینی دولهتیش ایستهگینی اۉزیگه خاص بالهلرچه تیلده افادهلهیدی. بو-او شو پیتگچ فقط سېس و تېگینیش آرقهلی تانیب کېلگن دنیانی اۉز کۉزلری بیلن کۉریش حقیدهگی عادی ایستک.
جاری ییلده جهان ساغلیقنی سقلش تشکیلاتی هم افغانستاندهگی دستورلرینی عملگه آشیریش اوچون مبلغ یېتیشمهیاتگنینی معلوم قیلدی. مبلغلر نینگ کمهیشی ایریم اهالی نینگ طبی خدمتلردن فایدهلنیشی قیینلشتیرگن و بعضی دوالهش مرکزیلری نینگ فعالیتینی دوام اېتتیریشگه هم تاثیر کۉرستگن.
ریحانه اوچون خلقارا همجمعیت یاردمی نینگ کمهییشی، ایش امکانیتلر نینگ قیسقریشی، اقتصادی قیینچیلیکلر و طبی خدمتلردن فایدهلنیشدهگی ممعمالر نینگ برچهسی بیر نقطهده ېیتی یاشلی قیز نینگ کۉزلری بیلن باغلنهدی.
بیر تماندن، ریحانه ایشیدن ایریلگن و روزغار خرجتلرینی قاپلشده قیینلهماقده. ایکّینچی تماندن اېسه، قیزی دوالنیشگه محتاج، عایله نینگ ترک اېتگنیدن بېری اولر بییلن علاقهگه چیقمهگن.
صالحه اوچون اېسه برچه بو معماسلر بیرته عادی آرزوده مجسم؛ بیر کونی کېلیب، او هم کۉره آلسه.
