امریکا تشقی ایشلر وزیرلیگی تامانیدن ینگی‌لیککه نشر اېتیلگن گزارش اساسیده، اوشبو مملکت احتیاط‌نی رعایت قیلیش شرطی بیلن، طالبان نظارتی آستیده‌گی افغانستان‌ده قنسولی خذمتلرنی قیته باشلشی‌نی تېکشیرماقده.
بوکون جمعه 13- دلو امریکا آوازی‌نینگ فارسچه بۉلیمی مذکور سنددن نقل قیلیب گزارش بېریشیچه، واشنگتن طالبان‌نی رسمیت گه تانیمسدن افغانستان‌ده قنده‌ی بیر شکلده قنسولی خذمتلرینی قیته آچیشی‌نی تېکشیره‌دی.
مذکور میدیانینگ یازیشیچه، افغانستان بۉییچه امریکا تشقی ایشلر وزیرلیگی‌نینگ ینگی ریجه‌سی 2023- ییل اکتوبر آیی‌ده تصویب اېتیلدی و مذکور ریجه‌ده قنسولی خذمتلر آچیلیشی یانیده، ایکی تامانلمه علاقه‌لر اوستیگه هم تاکید اېتیلگن.
بو میدیانینگ گزارشی‌گه کۉره، امریکانینگ ینگی ریجه‌سیده «ترورچیلیککه قرشی کوره‌ش، اقتصادی یاردملر، محلی علاقه‌لر و افغانستان‌ده امریکا یشاوچی‌لریگه قنسولی خذمتلر ترقه‌تیش و امریکاگه مهاجرت قیله‌دیگن افغانستان یشاوچی‌لریگه یاردم بېریش» شامل بۉله‌دی.
عین حالده، اوشبو سند امنیتی، سیاسی و اقتصادی مقصدلر اوچون طالبان برابریده امریکا سیاستی اۉزگریش احتمالی‌نی هم کۉرسته‌دی.
بو بیرینچی مرته دیر که، امریکا طالبان نظارتی آستیده‌گی افغانستان بیلن تعامل قیلیش اوچون بونده‌ی بیر ریجه نی تېکشیره‌دی.
2021- ییل آگست آیی‌ده امریکالیک حربیلر افغانستان نی ترک قیلگنیدن کېین، طالبان اوشبو مملکت‌نی نظارتی‌گه آلدی و حاضر ایکی ییل اۉتیشی بیلن تورلی مملکتلر طالبان بیلن دیپلماتیک علاقه‌لرینی دوام بېرگن بیرحالده، بیراق بو گروه‌نی رسمیت‌گه تانیمه‌گن.
