بیرلشگن ملتلر تشکیلاتی‌دن بیر منبع‌نینگ اۉزبېک تی‌وی گه ایتیشیچه، افغانستان اۉزبېک‌لری و پشه‌یی خلقی‌نینگ نماینده‌لری افغانستان ملی جنبش حزب رهبری مارشال عبدالرشید دوستم و افغانستان سابق جمهور رییسی محمد اشرف غنی بیلن یخشی علاقه‌گه بۉلگنلری باعث، دوحه ییغینی اشتراکچی‌لری رویخطی‌دن چیقاریلگن.
اوشبو منبع کیم‌لیگی فاش اېتیلیشی‌نی ایستمه‌ی اۉرغولشیچه، افغانستان اۉزبېک‌لری تامانیدن اوچ کیشی ایکی‌سی طالبان آدرسیدن و باشقه بیری اېسه جمهوریت تیزیمی فعالی صفتیده، مذکور ییغین گه اشتراک اېتیش اوچون چَقیریلگن اېکن.
منبع‌گه کوره، مذکور کیشی‌لردن 2 ته‌سی طالبان شرکت قیلمه‌سلیگی باعث و باشقه بیری اېسه مارشال عبدالرشید دوستم بیلن یخشی مناسبت‌گه بۉلگنی سبب، آت‌لری دوحه ییغینی اشتراکچی‌لری نینگ رویخطی‌دن چیقاریلگن.
منبع‌نینگ کۉپه‌یتیریشیچه، شونینگدېک پشه‌یی خلقی‌نینگ آدرسیدن هم بیر کیشی دوحه ییغینی‌گه شرکت قیلیش اوچون قرار قیلینگن اېکن، بیراق اوشبو شخص‌نینگ افغانستان سابق جمهور رییسی محمد اشرف غنی بیلن یقیینلیگی باعث، بو ییغین‌گه شرکت قیلیش‌دن محروم بۉلگن.
بیرلشگن ملتلر تشکیلاتی‌دن اوشبو منبع‌نینگ اۉزبېک تی‌وی گه بېرگن معلوماتی اساسیده، مذکور تشکیلات تامانیدن 29- و 30- دلو ده یۉلگه قوییلگن ییغینده، طالبان آدرسیدن 6 کیشی و افغانستان مدنی و انسان حقلری آدرسیدن باشقه 6 کیشی‌نینگ چَقیریلیشی‌گه قرار قیلینگن اېکن.
منبع گه کوره، دوحه ییغینی‌گه شرکت قیله‌دیگن افغانستان مدنی و انسان حقلری فعاللری‌نینگ سیاسی جریان‌لرگه تېگیشلی بۉلمه‌سلیکلری شرط اېکن و اۉزبېکلر نماینده‌سی مارشال دوستم بیلن یقیینلیگی باعث و پشه‌یی خلقی نماینده‌سی محمد اشرف غنی بیلن یخشی مناسبتده بۉلگنی سبب، بو ییغین گه شرکت اېتیش‌دن محروم بۉلگنلر.
منبع‌نینگ آچیق‌لشیچه، دوحه ییغینی‌نینگ باشله‌نیشی گه آز بیر زمان قالگن حالده، بیرلشگن ملتلر تشکیلاتی بونده‌ی بیر قرار آلگن.
اَیتیش کېره‌ک که منبع، دوحه ییغینی‌گه شرکت قیلیش اوچون چَقیریلگن اۉزبېک و پشه‌یی خلقی‌نینگ نماینده‌لرینی کیم‌لیگی توغریسیده معلومات بېرمه‌گن.
