بیرلشکن ملتلر تشکیلاتی باش کاتبی نینگ افغانستان‌ده‌گی مخصوص وکیلی و یوناما باشلیغی رزا اوتنبایوا، ۸ – مارچ مناسبتی بیلن ترقه‌تگن بیاناتیگه، افغانستان‌ده خاتین-قیزلر آغیر احوالیدن خواطر بیلدیرگن.
رزا اوتنبایوا، طالبان حکومتیدن افغانستان عیاللریگه قرشی بۉلگن چیکلاولر و یامان یانده‌شوولرنی توخته‌تیشینی خواهله‌گن.
اوتنبایوانینگ آرتیق‌لشیچه، افغانستان‌ده عیاللرگه قرشی یامان یانده‌شوولر و چیکلاولر دوام اېتگن حالده، افغانستان کوپراق قشاقلیک همده انزوا تامان کیته‌دی.
اوتنبایوا دنیا نینگ باشقه مملکتلریگه قرشی افغانستان‌ده عیاللر اوچون سلبی سرمایه یاتقیزیشلر بۉلیب یاتکنیدن خبر بیریب، ایتیشیچه: “بیز خلق‌ارا عیاللر کونینی بو ییل «عیاللر اوستیده سرمایه یاتقیزینگ” دیگن موضوع‌سی بیلن نشانله‌ماقده میز، شو اوچون رواجلنیش مقصد بۉلگن سعی‌وحرکتلریمیزنی ایکی برابر قیلیشمیز کېره‌ک، بو قیغولی دیر که افغانستان‌ده بونگه قرشی، عیاللر اوچون سلبی سرمایه یاتقیزیش بولماقده.”
ایتیش کېره‌ک که طالبان حکومتی حاضرگه قدر افغانستان‌ده خاتین-قیزلر حقلری نظرگه توتیلیشی بۉییچه ایچکی و خلق‌ارا ایسته‌کلرگه توجه قره‌تمه‌گن و عیاللرگه قرشی بۉلگن طالبان نینگ چیکلاولری همان دوام اېتماقده و بو چیکلاولر اېسه تاباره کوپه‌ییب بارماقده.
