تخار ولایتی نینگ تالقان شهریده، ایشچی‌لر اولر اوچون شوندی بیرکون بارلیگی همده قانونی حق‌لریدن آگاهسیز بیرحالده، هرکون‌لری دیک، روزغارلریگه نان تاپیش اوچون ایش قیدریب کېلگن.
اولر اما ایش یۉق‌لیگیدن شکایت‌ده و ایتیشلریچه، اقتصادی مجبوریت‌لری باعث ایش بۉلگن‌ده آغیر شرایطیده قره‌مسدن اولگوریش‌لری ممکن.
تخارلیک ایشچی‌لردن بیری بۉلمیش نورمحمد نینگ ایتیشیچه: “حاضر ایش یۉق، ایش بیر کون بۉلسه ینه بیرکون تاپیلمه‌یدی، یانیمده کورهسیز ۴۰ الی ۵۰ کیشی تۉریبتی بولرنی همه‌سی ایشچی، یریمی ایش تاپاله‌دی و یریمی تاپالمه‌یدی.”
بو ایشچی‌لر ایش‌سیزلیک همده آغیر ایش برابریده آزگینه درآمددن شکایت قېله‌دیلر.
تخارلیک ایشچی‌لردن ینه بیری تاج الدین نینگ سۉزلریگه کۉره: “بیر کون ایش بۉلسه بیر کون یۉق، تیناوون ایش تاپدیم، ۹۰ افغانی بېردی و بو پول‌نی قیرق افغانی‌سیگه نان ییدیم اېرته سحردن تا شام‌گچه کوپ یوز افغانی تاپه‌میز.”
بو ایشچی‌لر هرکونی باشلنیشی بیلن تالقان‌نینگ بیر چیککه‌سیده کېلیب، بیرانته ایش‌گه آلیب کېته‌می؟ و بو بیلن هیچ بۉلمسه روزغارلرینی بیرکون‌لیک احتیاج‌لرینی تیارلش‌گه قادر بۉله‌می؟ دېگن خیال‌ده تۉرگن.
ایشچی اېزلب کېلگن، آز کیشی‌لر هم بو ایشچی‌لر ایچیدن یاش و کوچلی‌سینی تَن‌لب آلیب کېته‌دی و بیرازگینه یاشی یوقاری کیکسه، کیشی‌لرنی معماسی، تخارنینگ ایش‌سیزلیک کوپراق سایه تشله‌گن بازاریده جدی‌راق.
یاشی کیکسه ایشچی‌لردن بیری نورآغا بوندی دیدی: “بای‌لر کېله‌دی، یاش و بچه‌خیل ایشچی‌لرنی آلیب کېته‌دی، یاشی کتته‌راق قاله‌دی، ایش یۉق شوندی پیشین‌دن کیین اۉی‌گه قیتیب کېته‌میز.”
حمیدالله رحمانی، تالقان شهریده‌گی ایشچی‌لردن بیری دیر. بو کیشی اېرته‌دن کېچگچه، شهر ایچیده کراچی‌سی بیلن ایلَنیب، آزگینه درآمد آرتیدن یورگنی و بو درآمد قییندلیک بیلن قۉلگه کېلیشی و ایریم کونلر هم اونی قۉلگه کېلتیریش‌گه موفق بۉلمسلیگیدن بیز بیلن دردلشه‌دی.
حمیدالله ایشچی‌لرنی آز درآمدینی سلبی تامان‌لریدن سۉزلب، انه‌شو باعث باله‌لرینی اوقیتیش‌گه هم قادر بۉلمه‌گنینی معلوم قېله‌دی. “پول یۉق‌لیکدن باله‌م نی هم مکتب و اوقیش‌گه قویالمه‌دیم، وضعیت جده یامان دیر.”
ایتیش کېره‌ک که افغانستان‌ده ایشچی‌لر قولب-قوتلنیشی مقصد ایش قانونی عملگه آشیریلمه‌گنی هردایم شکایت‌لرگه هم سبب بۉلگن.
