امریکا قوشمه ایالتلری نینگ جمهور باشلیغی جوبایدن، یکشنبه کونی، ۲۱ – سرطان، بو مملکت جمهورلیک ریاست سیلاویدن واز کیچدی.
دیمک بو قرارگه اساس، جوبایدن امریکا نینگ ۲۰۲۴ – ییل جمهورلیک ریاست سیلاویده، دیموکرات حزبی تامانیدن ایسکی رقیبی دونالد ترامپ برابریده سیلاو میدانگه چیقمهیدی.
جوبایدن تامانیدن بو قرار اعلام اېتیلیشی بیلن اونی برابریده بۉلگن مناسبتلر باشلندی.
گزارشلرگه کۉره، بو قرار دیموکرات حزبی اعضالرینی شاشیلینچ وضعیتگه قۉیلگن بۉلسهده، بیراق بو حزب اعضالری ینگی کاندید تانیشتیریشگه اولگورماقده.
حاضرگه قدر کۉپلب ایشانچلر جوبایدن اۉرین باسری کاملا هریس اوستیده دیر که دیموکرات حزبی تامانیدن سیلاو بیللشوولریده اشتراک قیلسه.
عینی حالده، جوبایدنگه رقیب حزب بۉلمیش «جمهوریخواه» پارتیهسی اعضالری بو وضعیتدن فایدهلنیب، جوبایدنگه قرشی تنقیدلرینی باشلهگن.
بو حزب کاندیدی بۉلمیش همده امریکا سابق جمهور باشلیغی دونالد ترامپ، بو توغریده فکر بیلدیریب، جوبایدننی امریکا تاریخیدهگی اینگ یامان جمهور باشلیغ دېب تعریفلگن.
شونینگدېک، امریکا نمایندهلر کېنگشی نینگ جمهوریخواه باشلیغی، جیم جردن، جوبایدن وضعیتدن تنقید قیلیب، اوندن جمهورلیک ریاستیدن هم استعفاگه چیقیشینی سۉرهگن.
جوبایدننی سیلاوده کاندیدلیگیدن واز کیچیشی برابریده بۉلگن مناسبتلر یالغیز امریکاده خلاصه بۉلیب قالمهگن، بلکیم دنیا بۉیلب مناسبتلرنی هم اورتهگه آلیب کېلگن.
کانادا و بریتانیا باش وزیرلری بو توغریده مناسبت بیلدیرگن دنیا رهبرلری جملهسیدن دیر که بو ایکی مملکت رهبرلری جوبایدن تامانیدن آلینگن بو قرارنی خوش قرشیلگن.
