افغانستان ملی اسلامی حزبی نینگ رهبری مارشال عبدالرشید دوستم، اۉتگن آقشم شنبه، ۱۳ – دلو امریکا قوشمه ایالتلری بیر هیات‌نی حضوری‌گه قبول قیلدی.
اوشبو ملاقات مارشال دوستم نینگ انقره شهریده‌گی اویی‌ده، یاپیق ایشیک‌لر آرقه‌سیده اۉتکزیلگن و ییغین‌ده افغانستان‌گه عاید مساله‌لر بحث اېتیلدی و کمبرلی لو باشچیلیگیده امریکا نینگ «خلق‌ارا تینچ‌لیک بنیاد» وکیللری بو ملاقاتده، ترامپ حکومتی افغانستان خلقی احوالینی سیزگن بیرحالده اولردن حمایه قیلیش‌گه قرار آلگنینی اعلام قیلگن.
دېیرلی بو یازووده امریکا قوشمه ایالتلری‌دن بۉلگن بیر هیات اوچ یریم ییل‌دن کیین طالبان‌گه قرشی ییریک سیما مارشال دوستم حضوریده کېلیشی قنچه‌لیک مهم و بو اینتیلیش‌لر همده افغانستان‌ده جاری وضعیت، بیران اوزگریش‌گه باعث بۉلیشی قنچه‌لیک ممکن‌لیگی حقیده فکر بیلدیرماقچن‌میز.
مارشال دوستم و امریکا
افغانستان جنبش حزبی نینگ رهبری مارشال عبدالرشید دوستم طالبان‌گه قرشی ییریک سیاسی و حربی سیمالردن دیر که افغانستان حاکمیتی طالبان قۉلی‌گه توشگنیدن بویان، افغانستان تقدیری برابریده بی‌پروا بۉلمه‌ی چاره-تدبیر کۉریب تورگنینی بیلدیریب کېلگن. بیراق بو اوچ یریم ییل ایچیده مارشال دوستم تامانیدن عملی بیران آدیم کوتاریلگن اېمس.
انه‌شوو باعث، تورکیه‌ده مارشال دوستم و امریکالیک هیات آره‌سیده ملاقات اۉتکزیلیشی اینیقسه حاضرگی شرایطده کتته اهمیتگه ایگه دیر چونکه بوندن ایلگری مارشال دوستم طالبان‌گه قرشی آدیم کوتاریش اوچون امریکا و خلق‌ارا هم‌جمعیتی یاردمینی کوتیب تورگنینی اعلام قیلگن.
مارشال دوستم میلادی ۲۰۲۳ – ییلی جولایی آیی ایچیده «رولینگ استون» ناملی بیر یېتکیرمه بیلن اۉتکزگن صحبتیده، امریکا تامانیدن سیاسی قوللب-قوتلنگن تقدیرده، طالبان‌نی شکست بیریشی‌دن وعده بېرگن اېدی.
مارشال دوستم اوشبو صحبت‌لریده بوندی دېب تاکید قیلگن: “طالبان بیزلرنی الده‌دی طالبان‌گه قرشی کوچ ایشله‌تیش کېره‌ک. بیز طالبان‌گه قرشی امریکالیک اوچاق یا ده تانک‌لرگه کېره‌ک میز یۉق. بیز یالغیز سیاسی حمایه خواهله‌یمیز.”
ایتیش کېره‌ک که مارشال دوستم و امریکا قوشمه ایالتلری نینگ یقین‌لنیشیدن شبهه‌سیز طالبان هم خواطرده بۉلیشی ممکن. چونکه امریکا قوشمه ایالتلری طالبان بیرینچی دور حاکمیت‌نی شکست بیریش اوچون مارشال دوستم یاردمی و طالبان‌گه قرشی بو سیماگه ایشانگن اېدی و نهایت مارشال دوستم و امریکالیکلر بو کیلیشووی طالبان حاکمیتی بیرینچی دوری قوله‌شیگه سبب بۉلدی. شو سبب طالبان هم مارشال دوستم و امریکالیکلر یقین‌لنیشیدن یخشی تجربه‌لری یۉق دیر.
طالبان‌گه قرشی امریکا سیاستی اوزگریشی
تورکیه‌ده امریکا قوشمه ایالتلری نینگ هیاتی طالبان‌گه قرشی افغانستان سابق سیاسی سیمالری بیلن اوچره‌شیشی شوندی بیرحالده خبر قیلینماقده دیر که امریکا ده دونالد ترامپ حکومت‌گه قیتگنیدن بیری، بو مملکت نینگ طالبان اوستیده باسیمی جدی‌لشماقده دیر.
امریکا سیاستیده‌گی بو اوزگریش آرتیدن، افغانستان اوچون بۉلگن امریکا قوشمه ایالتلری نینگ یاردمی تۉخته‌تیلگنی خبر قیلیندی و اۉتگن کون جمعه، ۱۲ – دلو، امریکا قوشمه ایالتلری نینگ جمهور باشلیغی دونالد ترامپ ینه بیربار، بو مملکت افغانستان‌دن چیقیشیدن تنقید قیلدی.
بو چیقیش آرتیدن بگرام هوایی پایگاه‌سی چین قۉلی‌ده توشیب قالگنینی تاکید قیلگن امریکا قوشمه ایالتلری نینگ ینگی جمهور باشلیغی دونالد ترامپ.
عینی حالده، دونالد ترامپ کابینه‌سی تشقی ایشلر وزیری مارک روبیو کبی طالبان‌گه جدی قرشی سیمالر حضوری، امریکا نینگ طالبان‌گه قرشی سیاستی اوزگریشی ممکن‌لیگینی بیلدیریب کېلگن.
دنیا هم‌جمعیتی نینگ سابق سیاسی سیمالرگه نسبتن ایشانچ‌سیزلیگی
طالبان‌گه قرشی امریکا سیاستی اوزگریشی اوچون امیدلر شوندی بیرحالده دیر که امریکا قوشمه ایالتلری شامل خلق‌ارا هم‌جمعیتی اینیقسه غربی مملکتلر افغانستان سابق سیاسی سیمالری‌گه نسبتن ایشانچ‌سیزراق دیر.
انه‌شوو سبب اۉتگن اوچ یریم ییل ایچیده، بو مملکتلرنی هیچ بیری طالبان‌گه قرشی بو سیمالردن هیچ قندی حمایه قیلمه‌گن و بونی یانیده، بریتانیا کبی مملکتلر هم افغانستان مساله‌سیده، طالبان‌گه قرشی حربی جریان‌لرنی قوللب – قوتلمسلیگینی اعلام قیلگن.
عینی حالده، افغانستان سابق سیاسی سیمالری آره‌سیده هم اۉتگن اوچ یریم ییل ایچیده، دنیا هم‌جمعیتی نینگ افغانستان تقدیری اوچون اونملی ریجه‌لری بارلیگی اوچون هم قناعت بېرالمهگن. یا هم بو حقده عملی بیر ریجه یا ده یۉل خریطه‌لری یۉق دیر.
طالبان نینگ ایچکی کیلیشماوچیلیکلری
طالبان حاکمیتی افغانستان‌ده شوندی بیرحالده دوام اېتماقده دیر که بو حاکمیت حاضرگه قدر هیچ بیر مملکت تامانیدن رسمیت‌گه تن آلینگن اېمس و شو سبب سیاسی تقدیرسیزلیک بیرحالده دوام اېتیب کېلماقده دیر.
طالبان یقین بو اوچ یریم ییل ایچیده، رسمیت‌گه تَن آلینیش اوچون انسان حقلری کبی مساله‌لرنی رعایت قیلمه‌ی نه فقط دنیا مملکتلرینی اۉزلریدن ناامید قیلماقده دیر. بلکیم بو مساله طالبان آره‌سیده هم کیلیشماوچیلیکلرنی اۉرته‌گه آلیب کېلگن.
یقین وقتلر ایچیده، طالبان آره‌سیده بو کبی تارتیشوولر جدی‌لشگنی خبر قیلینماقده و شو سبب بو گروه تشقی ایشلر وزیرلیگی نینگ سیاسی اۉرین باسری، شیرمحمد عباس استانکزی افغانستان‌نی ترک اېتگنی هم معلوم قیلینگن.
خلاصه‌ده ایتیش کېره‌ک که طالبان حاکمیتی بو شرایطده دوام اېتیشی قییند و دنیا طالبان‌گه قرشی تۉخته‌ش گه حاضر تیار بۉلمسه هم بو گروه نینگ حاضرگی سیاستی و ایچکی تارتیشوولری همده دوام اېتیب تورگن سیاست‌لری افغانستان‌ده بیران اوزگریش اوچون زمینه یره‌تیشی گمان‌دن تشقری اېمس دیر.
