رواداری انسان حقلری تشکیلاتی یقین‌ده بیر گزارش نشر قیلیب، افغانستان اۉتگن میلادی ییلی دوامی‌ده گواهی بۉلگن خوفسیزلیک و انسان حقلری وضعیتی خصوصیده معلومات بېرگن.
رواداری تشکیلاتی نینگ بیر ییل مابینیده تیکشیریشی نتیجه‌سیده قۉلگه کېلگن اوشبو گزارش اساسیده، افغانستان‌ده طالبان تامانیدن ناقانونی اۉلدیریش‌لر، توتقین‌گه آلیش، شکنجه اېتیش همده قوم و مذهب اساسیده بۉلگن تبعیض‌لی یانده‌شوولر جدی‌لشگن.
ناقانونی اۉلدیریلیش، حبسگه آلینیش و شکنجه‌لر
رواداری تشکیلاتی اۉزی نینگ گزارشی‌ده اعلام قیلیشیچه، افغانستان‌ده میلادی ۲۰۲۴ – ییلی جریانیده، اۉتگن بیر ییل‌گه نسبتن طالبان‌گه قرشی گروهلر بیلن همکارلیک قیلیش‌گه عیب‌لنگن شخص‌لرنی، مقصدلی و سِرلی اۉلدیریلیشی رقمی ایکی برابر، جبری یۉق اېتیلیش ۷۰ فایز، اۉلیم‌گه باعث بۉلگن شکنجه ۲۵ فایز، ناقانونی و اۉز باشیمچه‌لیک حبسگه آلیش ۴۲ فایز کۉپه‌یگن.
شونینگدېک رواداری تشکیلاتی، اۉتگن میلادی ییل دوامی‌ده، افغانستان‌ده سابق حکومت حربی‌لری و خادملری همده اولرنینگ عایله اعضالری نینگ اۉلدیریلیشی و توتقین‌گه آلینیشی هم خواطرلی بیرحالده کۉپه‌یگن.
اوشبو گزارش اساسیده، میلادی ۲۰۲۴ – ییل دوامی‌ده، سابق حکومت حربی‌لری و خادملری نینگ اۉلدیریلیشی ۹ فایز و ناقانونی و اۉز باشیمچه‌لیک حبسگه آلینیشی ۲۰ فایز کۉپه‌یگن.
انسان حقلری آغیر احوالی و طالبان نینگ قومی و مذهبی تعصب‌لری
رواداری تشکیلاتی اۉزی نینگ گزارشی‌ده، طالبان حاکمیتی آستیده انسان حقلری احوالی آغیر بۉلگنیدن خواطر بیلدیرگن.
اوشبو گزارش‌نی بیلدیریشیچه، طالبان تامانیدن انسان حقلری نقض اېتیلیشی اینقسه خاتین-قیزلرگه قرشی چیکلاولر «امر بالمعروف» قانونی تصدیق‌لنگندن کیین جدی بیر حالده عملگه آشیریلگن.
شونینگدېک بو تشکیلات اۉزی نینگ گزارشی‌ده، طالبان نینگ قومی و مذهبی تعصب‌لریدن هم خواطر بیلدیریب، طالبان افغانستان نینگ ملی منبع‌لری‌دن فایده‌لنیش خصوصیده تعصب‌لی یانده‌شوو اختیار قیلیب، ایریم قوملرنی محروم قیلگن همده دولت اداره‌لریده ایش‌گه آلیش‌لر و ایش‌دن چیقاریلیش‌لر هم تعصب‌لی بیر یانده‌شوو آرقه‌لی بجریلگن.
عینی حالده، طالبان مذهبی تعصب‌لرنی هم کۉپه‌یتیریب، بو حقده باسیم‌لرنی آشیرگن.
رواداری تشکیلاتی اۉزی نینگ گزارشی‌ده، طالبان تامانیدن اطلاعات‌گه قۉل تاپیش زمینه‌لری هم یۉق اېتیلیب، طالبان انسان حقلری قربان‌لرینی اولر اوستیده بۉلگن ظلملرنی هیچ بیرجایده تیلگه آلمسلیگی اوچون باسیم کېلتیرگنینی معلوم قیلگن. رواداری تشکیلاتی اوشبو وضعیت باعث، انسان حقلری نقض اېتیلیشی قربان‌لری وضعیت‌نی مستند اېتیش قییندلشگنینی بیلدیرگن.
دېیرلی رواداری تشکیلاتی اوشبو گزارش‌نی افغانستان بویلب ۳۰ ولایتده انسان حقلری نقض اېتیلیشی قربان‌لری بیلن بۉلگن صحبت‌لردن کیین تیارله‌گنینی هم معلوم قیلدی.
