افغانستان تورکتبار عیاللری حرکتی، امریکا قوشمه ایالتلری نینگ افغانستان بۉییچه سابق مخصوص وکیلی زلمی خلیلزاد تورموش اورتاغی شرل بنارد اخیرگی بیاناتی برابریده مناسبت بیلدیردی.
بو حرکت تامانیدن نشر اېتیلگن بیانات‌ده، خانم بنارد نینگ «نشنل انترست» ویب سایتی آرقه‌لی، افغانستان احوالی خصوصیده نشر اېتیلگن سۉزلری ناتۉغری دېب تاکید اېتیلگن.
افغانستان تورکتبار عیاللری حرکتی، زلمی خلیلزاد تورموش اورتاغی سۉزلرینی افغانستان‌ده دوام اېتیب تورگن وضعیت گه قرشی دېب، افغانستان خلقی نینگ اقتصادی احوالی و اۉزبېکلر و هزاره‌لر کبی ملیت‌لر اۉقیش‌گه قۉل تاپیشی اوچون بۉلگن چیکلاولر نظرگه توتیلگن حالده، افغانستان اهالیسی باله‌لرینی خصوصی مکتب‌لرگه یوباریلیشی، اۉرین‌سیز بیر تکلیف دېب بیلدیرگن.
شونینگدېک افغانستان تورکتبار عیاللری حرکتی، خانم بنارد تامانیدن افغانستان، هندوستان بیلن مقایسه اېتیلگنینی هم تنقید قیلیب، بو کیشی تامانیدن بیان اېتیلگن سۉزلر، افغانستان‌لیک مهاجرلر حقارت‌لنیشینی دېب معلوم قیلگن.
عینی حالده، افغانستان تورک عیاللری، بو کبی سۉزلرنی انسان حقلری‌گه قرشی بیانات بیلیب، افغانستان‌ده دوام اېتیب تورگن وضعیت برابریده جیم تورمسلیک‌نی تکلیف قیلدی‌لر.
زلمی خلیلزاد تورموش اورتاغی، افغانستان‌گه بۉلگن سفری‌دن کیین، بیر یازوو نشر قیلیب، افغانستان احوالینی یخشی و مهاجرلر قیتیب کېلیشی اوچون مناسب بیان قیلگن اېدی.
ایتیش کېره‌ک که زلمی خلیلزاد، دوحه سۉزلشوولری‌ده‌گی حصه‌سی و طالبان حاکمیت‌گه قیتیشی اوچون بۉلگن رولی باعث، افغانستان خلقی تامانیدن تنقید اېتیلیب کېلماقده دیر.
