کندوز شهری نینگ بیر چیککه‌سیده، افغانستان‌ده اۉقیش‌دن محروم اېتیلگن میلیونلرچه قیزلردن بیری نرگس، ناانیق کېله‌جک بیلن یشه‌ماقده.
نرگس اۉزبېک تی‌وی ژورنالیستی بیلن بۉلگن صحبت‌لریده، کېله‌جکده جماعه‌گه فایده‌لی بیر انسان بۉلیش اوچون درس اۉقیب تورگنی همده بو حاضر اۉقیش ایشیک‌لری یوزیگه یاپیلیشی بیلن آغیر تشویش‌ده حیات کېچیریب تورگنیدن سۉزله‌یدی.
دېیرلی کندوزلیک اۉزبېک قیز نرگس، طالبان تامانیدن اۉقیشی تقیق‌لنمه‌گن تقدیرده حاضر ۱۱-صنف مکتب اۉقووچیسی اېدی. بیراق حاضر بو محرومیت دردلری بیلن اوی‌ده قمه‌لیب قالگن.
نرگس نینگ ایتیشیچه «مین ۸ – صنف مکتب اۉقووچیسی اېدیم که امارت اسلامی اوچون مکتبدن قالدیم. اگرده امارت اسلامی بۉلمسه اېدی مین شو حاضر ۱۱ – صنفت بولر اېدیم.»
نرگس اۉزبېک تی‌وی بیلن بۉلگن صحبت‌لریده، اۉقیش‌دن محروم اېتیلگنی او اوچون قنچه‌لیک آغیر توشگنی حقیده، سۉزلب بېره‌دی.«مکتب‌لر باغلنگن کون‌دن بیری کۉپ قیغوده‌من، خواطرلی حیات کېچیرماقده‌من، هر بیربار کتاب‌لریمگه قره‌سم ییغله‌یمن. مکتب کییم‌لری‌گه قره‌سم ییغله‌یمن. کۉپ تشویش قیلگنیم اوچون بعضا روحی کسللیک اوستیمگه کېله‌دی.»
حاضر دنیاده قیزلرینی اۉقیش‌دن تقیق‌لگن یکه‌ویگانه مملکت نینگ بو یشاوچیسی، اۉزی دیک کۉپلب افغانستان‌لیک قیزلر کبی، بو جنسیت‌گه اساس تبعیض دردلری و روحی جراحت‌لریدن آزگینه بۉلسه هم قاچیش اوچون اوی ایش‌لریگه یوز کېلتیرگن.
نرگس کېله‌جکده شفاکار بۉلیب، جماعه‌‌ده خلق‌نی دوالش‌نی آرزو قیلر اېدی. لیکن حاضر اۉزی افغانستان جماعه‌سیده‌گی جنسیت‌گه اساس، ییریک چیکلاو و کسللیک بیلن دوچ کېلگن.
کندوزلیک بو قیزنینگ کۉپه‌یتیریشیچه «داکتر بۉلیش‌نی مقصد قیلگن اېدیم. شو اوچون درس‌لرگه کۉپ اینتیله‌یدیم تا یوقاری نمره‌لر آلسم.»
کندوزلیک بو اۉزبېک قیزنی اساسی تشویشی بو کېله‌جگی دیر. نرگس تون‌وکون کېله‌جگی اویلاوی‌ده اۉتسه‌ده، بیراق هلی هم بیر یاروغ‌لیک کېلیب کېله‌جگی اوچون یخشی کونلر کېلیشی‌دن امید اۉزمه‌گن.
نرگس بو حقده بوندی دېدی “آینده هیچ کیم‌گه بیللی اېمس، امید قیله‌من مکتب و بیلیم یورتلر ایشیک‌لری بیزلرنی یوزیمیزگه آچیلسه تا قیزلر هم اۉقیسه و بوندی بخت‌سیز بۉلمسه.”
ایتیش کېره‌ک که طالبان اوچ ییل‌دن بیری، ایچکی و خلق‌ارا طلب‌لرگه قرشی قیزلرنی اۉقیش‌دن چیتگه قالدیریب کېلماقده دیر
