تورکیه نینگ پایتختی انقره شهریده، لاجورد یۉلی تدقیقات مرکزی رهبرلیک هیاتی‌دن تشکیل اېتیلگن بیر قنچه فعاللر، بیرلشکن ملتلر تشکیلاتی نینگ افغانستان انسان حقلری بۉییچه مخصوص گزارشگری ریچارد بنت بیلن اوچره‌شدی.
دېیرلی بوگون شنبه ۷ – سرطان اۉتکزیلگن بو اوچره‌شووده، افغانستان احوالی اینقسه مملکت نینگ تورکلری گواهی بۉلیب تورگن وضعیت و طالبان حاکمیتیده نقض اېتیلیب تورگن، افغانستان تورکلری نینگ انسانی حقلری خصوصیده فکر المشتیریلگن.
بو حقده اۉزبېک تی‌وی اختیاریده قرار تاپکن معلومات‌گه کۉره، اوچره‌شووده قوییده‌گی مساله‌لر بحث اېتیلگن:
ییرلر غصب اېتیلیشی: بو اوچره‌شووده، لاجورد یۉلی تدقیقات مرکزی رهبرلیک هیاتی تامانیدن، افغانستان تورکلری نینگ بابا-اجدادلریدن قالگن ییرلری زور بیلن آلینیب یاتکنی و بو وضعیت سبب اۉرتهگه کېله‌یاتکن جبری کوچیریش‌لر خصوصیده مستند کۉرینیش‌ده معلومات ارایه اېتیلیب، بو مرکز اعضالری اۉز خواطرلرینی بیرلشکن ملتلر تشکیلاتی مخصوص گزارشگری بیلن شریک قیلگن.
افغانستان تورک عیاللری‌گه نسبتن مضاعف تبعیض: اوچره‌شووده بحث اېتیلگن موضوع‌لردن ینه بیری، افغانستان تورک خاتین-قیزلری نینگ احوالی دیر که بو اوچره‌شووده، افغانستان تورک خاتین-قیزلری جنسیت همده قومیت‌گه اساس یوز مه یوز بۉلیب تورگن تبعیض و چیکلاولری بحث اېتیلیب، وضعیت خصوصیده خواطرلر تیلگه آلینگن.
عامه خذمت‌لرگه قۉل تاپمسلیک: لاجورد یۉلی تدقیقات مرکزی رهبرلیک اعضاسی، ریچارد بنت بیلن اۉتکزگن خاص اوچره‌شوولریده، افغانستان‌ده تورکی خلقلر جمله‌دن اۉزبېکلر و تورکمن‌لر عامه خذمت‌لرگه قۉل تاپیش اوچون تبعیض‌لر بیلن یوز مه یوز بۉلگنینی بیلدیریب، شو سبب اولر کۉپلب عامه خذمت‌لردن محروم اېتیلگنینی اورغولهگن.
تورکلرگه قرشی تیزیملی تبعیض: مذکور اوچره‌شووده طالبان حاکمیتی آستیده بۉلگن افغانستان‌ده، مملکت نینگ تورک خلقی تیزیملی روشده تبعیض بیلن دوچ بۉلگنی تاکیدلنیب، شو وضعیت سبب اولر اۉقیش، ساغلیق خذمت‌لری و شونگه اوخشش باشقه عامه خذمت‌لر محروم اېتیلماقده‌لیگی بیلدیریلگن. عینی حالده اوچره‌شووده، افغانستان‌ده تورکلرگه نسبتن موجود تبعیض‌لر باعث، اولر تیزیملی روشده قشاق‌لیککه اسره‌لیشی اوچون سعی‌وحرکت بۉله‌یاتکنی همده دنیا هم‌جمعیتی نینگ انسان‌پرورلیک یاردملری افغانستان اهالیسی آره‌سیده تبعیض اساسیده، ترقه‌تیلیب تورگنیدن خواطرلر بیان بۉلینگن.
شو بیلن بیرگه اوچره‌شووده، طالبان حاکمیتیده افغانستان تورک خلقی نینگ احوالی آغیر بیان بۉلیب، اولرنینگ تیلی و مدنیتی رواجلنیش همده انسانی حقلری ایاغ آستی بۉلیشی آلدی آلینیشی مقصدیده، جدی چاره-تدبیرلر کۉریلیشی تاکیدلنگن.
