عبدالواحد رحیق
الحاج صوفی نظرمحمدنینگ اۉغلی عبدالواحد رحیق، ۱۳۳۸-ییلده علملی، فضیتلی و شرَفلی بیر عایله‌ده، میمنه شهری‌نینگ مرکزیده توغیلگن. باشلنغیچ و اۉرته تعلیمنی اوّل اۉرته مکتبده، سۉنگره ابوعبیدجوزجاني لیسه‌یده آلگن. موسیقی صنعتیگه نهایتده قیزیققنی اوچون یاشلیکدن بو ساحه تامان یوزلنه‌دی. عایله‌وي یقینلیگی سببلی عمکی‌بچه‌سی عبدالاحد سحر بیلن بیرگه موسیقی یۉلیده قدم تشله‌یدی. موسیقی‌ده‌گی استعدادی بیلن تېز آره‌ده ابوعبیدجوزجاني لیسه‌سی‌نینگ موسیقي هنری گروهیگه اعضا بۉله‌دی. بو گروه اۉشه دور یاشلر آره‌سیده جوده مشهور اېدی. عبدالواحد رحیق‌نینگ ایجادی هم قیسقه فرصتده مخلصلرنینگ اعتبارینی اۉزیگه تارته‌دی.
او نه‌فقط موسیقی صنعتیده، بلکه تمثیل (تصویري صنعت/تیاتر) ساحه‌سیده هم استعدادگه اېگه اېدی. ابوعبیدجوزجاني لیسه‌سی ممثللر تامانیدن شهردارلیک پارکیده نمایش اېتیله‌دیگن نمایشنامه‌لرده باشقه اۉقووچی و معلملر بیلن بیرگه رۉل اجرا اېتگن. اۉشه ییللرده او کنسرت و رسمي دستورلرده هم فعال قتنه‌شگن. بو دستورلرنی مشهور و ایجادکار استاد محمدشریف یعقوبي (لیسه نینگ ایلغار استادلریدن بیری) باشقرر اېدی. تیاتر بۉلیمیده اېسه مرحوم ابراهیم‌خان (باش اۉقیتووچی، دایرکتر و مکیاژگه هم قۉلی اوستون اېدی) باشچیلیک قیلگن. عبدالواحد رحیق اولرنینگ رهبرلیگیده کۉپلب رۉللر اجرا اېتگن. او کۉپلب بیره‌م و مراسملرده فعال قتنه‌شیب، هنری نمایش اېتگن. شونینگدېک، ابوعبید جوزجانی لیسه‌سیده اۉقیب یورگن دوریده و کېینچه‌لیک، ۱۳۵۷ ییلده فاریاب معلملر تیارلش موسسه‌سیگه کیرگچ هم، قۉشیقچیلیک صنعتی بیلن شغللنگن. او ۱۳۵۶ ییلده لیسه‌نی تمامله‌گونیگه قدَر موسیقي گروهده فعالیت کۉرسه‌تیب، کنسرتلر، رسمي دستورلر، بیره‌ملر و باشقه تدبیرلرده جانبازلیک بیلن اشتراک اېتیب، صنعتینی نمایان قیلگن.
عالي تعلیمی و رسمي وظیفه‌لری
عبدالواحید رحیق لیسه دورینی توگتگچ، فاریاب عالي معلملر تیارلش انستیتوتیگه (حاضرگی فاریاب بیلیم یورتی) اۉقیشگه کیردی و ۱۳۵۸ ییلده انگلیس-دري تیلی و ادبیاتی یۉنه‌لیشینی بیتیردی. او قیسقه مدت، تخمیناً ۲-۳ آی دوامیده ابوعیبد جوزجانی لیسه‌سیده اۉقیتووچی بۉلیب ایشله‌دی. اما دولت و مجاهدلر اۉرته‌سیده اوروش اوج آلیشی همده عمومي بسیج اعلان قیلینیشی سببلی، او مجبور‌ن حربي خدمتگه جلب قیلیندی.
رسمي روشده ۶ آیلیک خدمت بۉلیشی کېره‌ک بۉلسه-ده، دولت تیزیمیده‌گی خطالیک و بوروکراتیک ترتیبلر طفیلی او آغیر شرایطلرده کابل‌ده ۲ ییل دوامیده مجبوري حربي خدمت اۉته‌دی. اونینگ ایتیشیچه، بو دور حیاتیده‌گی اېنگ اچّیق خاطره‌لردن بیری بۉلیب، اونی هېچ قچان اونوتالمه‌یدی. شوندن سۉنگ جناب رحیق ۸ یریم ییل دوامیده کابل شهریده‌گی میرویس هوتکي مکتبیده حلاللیک، فداییلیک و اۉقیتووچیلیککه بۉلگن محبتی بیلن فعالیت یوریتدی. او بو وظیفه‌نی عشق و مِهر بیلن دوام اېتتیردی. اۉقیتووچیلیک کسبیگه بۉلگن محبتی و اۉقووچیلرنینگ کېله‌جگیگه مهربانلیک بیلن اۉز خدمتینی ادا اېتردی. اونینگ ادبي استعدادی و دیدی بلند بۉلیب، مینگلب بَیت شعرلر، مشهور ادیب و علّامه‌لردن قالگن حکمتلی سۉزلر و مقاللرنی یاددن بیلردی. او اولرنی نازکلیک و ظریفلیک بیلن اجتماعي حیاتیده قۉله‌ی آلردی.
کابل‌ده صنعتده‌گی فعالیتلری
جناب رحیق، کابل‌ده رسمي وظیفه‌لری بیلن بیر قطارده، اۉزی‌نینگ هنری فعالیتینی هم دوام اېتتیرگن. شو دورده او کۉپلب صنعتکارلر بیلن یقین علاقه‌ده بۉلگن. بیر مدت مملکت‌نینگ نانیقلی آوازخوانی و کمپوزیتوری جناب عبدالله نوابی (شادکام) رهبرلیگیده موسیقه فعالیتینی دوام اېتتیردی. جناب رحیق، ظفر هنری گروهی‌نینگ (افغانستان اۉزبېکلری نینگ موسیقی گروهی) تشکیل تاپیشیدن کېین، کابل‌ده اۉتکزیلگن تورلی صنعت دستورلریده اشتراک اېتدی. شو ییللرده او بیر نېچته قۉشیقلرنی فارس تیلیده افغانستان رادیوسی آرشیفیده یازیب قالدیرگن همده کمپوزی استاد شادکامگه تېگیشلی بۉلگن بیر قۉشیغی افغانستان تلویزیونیده هم یازیب آلینگن. اما مملکتده‌گی سیاسي و امنیتی وضعیت آغیرلشگچ، او ۱۳۶۹-ییلده عایله‌سی بیلن اروپاگه هجرت قیلدی و حاضرده عایله‌سی بیلن سویت زرلند‌ده یشب کېلماقده.
محمد کاظم امینی
تهران-ملارد
ترجمان: محمدحسن تۉلقین
