بوگون سپتمبر آیی‌نینگ ۲۱ – سی و سنبله آیی‌نینگ ۳۰ – سی خلق‌ارا تینچ‌لیک کونی بیلن ماس دیر.
اوشبو کون مناسبتی بیلن بیرلشکن ملتلر تشکیلاتی باش کاتبی آنتونیو گوتریش، نشر قیلگن بیاناتیده اوروش ویران قیلگن دنیا تینچ‌لیک اوچون فریاد چیقاره‌دی دېب بیلدیردی.
بیرلشکن ملتلر تشکیلاتی‌نینگ باش کاتبی، اوروش و ناتینچ‌لیکلر قربان‌لیکلری اینقسه باله‌لر اۉلیمی‌گه اشاره قیلیب، تینچ‌لیک تامین‌لنیشی اوچون جدی سعی‌وحرکت اېتیلیشینی سۉره‌دی.
بو ییل تینچ‌لیک کونی شوندی بیرحالده ییتیب کېلماقده دیر که سونگی ییللرده، دنیانینگ تینچ‌لیک احوالی آغیرلشیب، غزه و اوکراین کبی حدودلرده اوروش و ناتینچ‌لیک جدی دوام اېتماقده دیر.
افغانستان هم اوزاق ییللیک اوروش‌دن کېین طالبان حاکمیتی سایه‌سی آستیده توشیب قالگن و جبهه‌ای اوروشلر مملکتده سیزیلرلی درجه‌ده آزه‌یگن بۉلسه‌ده، بیراق بیر قنچه فعاللر افغانستان‌ده هلی هم حقیقی تینچ‌لیک تامین‌لنمه‌گنینی بیلدیره‌دیلر.
افغانستان انسان حقلری فعاللری بیرلشمه‌سی تینچ‌لیک کونی مناسبتی بیلن نشر قیلگن بیاناتیده، طالبان حاکمیتیده افغانستان خلقی ناتینچ احوالده حیات کېچیریب تورگنینی معلوم قیلدی.
فعاللر بیرلشمه‌سی اۉز بیاناتیده، افغانستان‌ده دوام اېتیب تورگن اقتصادی باسیم‌لر و طالبان چیکلاولر و قتتیق یانده‌شوولری اهالی‌دن تینچ‌لیک‌نی آلگنینی بیلدیرگن.
شونینگدېک بو فعاللر، افغانستان‌ده ترورچیلیک یۉق اېتیلیشی و حقیقی تینچ‌لیک تامین‌لنیشی مقصدیده کوره‌شیش کېره‌ک‌لیگینی هم تاکیدلدی.
