یقین‌ده فعالیت‌گه باشله‌گن افغانستان عیاللری اوچون بۉلگن مخصوص خلق محکمه‌سی‌نینگ عمومی مجلسی بوگون چهارشنبه ۱۶ – میزان باشلنیب، افغانستان‌ده خاتین-قیزلر گواهی بۉلیب تورگن احوال‌نی تیکشیره‌دی.
دیمک اسپانیانینگ پایتختی مادرید شهریده اۉتکزیلیشی ریجه‌لشتیریلگن بو مجلس، جمعه کونی ۱۸ – میزان‌گه قدر دوام اېتیب، مجلس‌ده طالبان حاکمیتی چیکلاولری و بو حاکمیت تامانیدن بوزیلگن، انسان حقلری قربان‌لری اوله‌راق خاتین-قیزلر گواه‌لیک بېریشی کوتیلهدی.
شونینگدېک مجلس اعضالری بۉلمیش، انسان حقلری و مدنی فعاللر و متخصص‌لر افغانستان‌ده بوزیله‌یاتکن انسان حقلری احوالی‌دن حجت و اثبات‌لر ییغیب، جمعه کونی بو حقده بیانات نشر قیله‌دی.
عینی حالده مذکور محکمه‌نینگ قراری، کېله‌سی قوس آیی‌ده اعلام اېتیلیشی هم معلوم قیلینگن.
ایتیش کېرهک که مذکور محکمه اجرایی بورچ‌گه ایگه بۉلمه‌ی، بلکه افغانستان‌ده دوام اېتیب تورگن وضعیت و انسان حقلری بوزیلیشینی تیکشیریش مقصدیده ایشگه باشله‌گن.
افغانستان عیاللری اوچون خلق محکمه‌سی تامانیدن توپله‌نگن حجت و اثبات‌لر همده اعلام قیلینگن قرار، افغانستان‌ده دوام اېته‌یاتکن انسان حقلری احوالی‌دن آگاه قیلیش و خلق‌ارا جنایت‌لرگه قرشی کوره‌ش محکمه‌سی کبی تشکیلات‌لرنی افغانستان‌گه نسبتن قرار آلیش‌ده، یاردم بېریشگه سبب بۉلیشی مقصد قیلینگن.
دیمک افغانستان سابق انسان حقلری کمیسیونی‌نینگ باشلیغی شهرزاد اکبر اسد آیی‌نینگ ۹ – کونی اۉز ایکس صحیفه‌سیده بیانات یازیب، بو محکمه ایشگه باشله‌گنیدن خبر بېرگن اېدی. مذکور محکمه فعالیتی‌دن اساسی مقصد طالبان نینگ افغانستان‌ده خاتین-قیزلرگه نسبتن باسیم‌لر و چیکلاولریگه قرشی عدالت ایزلش دېب بیلدیریلگن.
