بنیامین نتانیاهو، اسراییل غزه چېگره حدودیده خلق ارا خوفسیزلیک کوچلریگه قیسی دولتلر رهبرلیک قیلیشینی تعیینله‌یدی. امریکا قۉشمه ایالتلر باسیمینی آستیده اېریشیلگن آتیش-کېسین‌گه کۉره، بو مسئولیت اساساً عرب یاکه مسلمان دولتلریدن کېلگن کوچلرگه بېریله‌دی.
اسراییل باش وزیری بنیامین نتانیاهو یکشنبه ۴-عقرب، اۉز بیاناتیده تٱکیدلب اۉتدی، اسراییل “اۉز قرارینی اۉزی قبول قیله‌دی: قیسی دولتلر غزه چېگره حدودیده خلق ارا خوفسیزلیک کوچلریگه قۉشیله‌آله‌دی” و “دشمن‌لریگه قچان هجوم قیلیشنی تعیینله‌یدی”. بو سۉزلر غزه حدودیده مصرلیک یاردم گروه‌لری اشتراک اېته‌یاتگن پیتده ایتیلدی.
امریکا قوشمه ایالتلر واسطه‌چیلیگیده اېریشیلگن آتیش-کېسین شرطلری‌گه کۉره، اسراییل کوچلری غزه حدودیدن آرتگه چېکینه‌یاتگندن، اساساً عرب یا مسلمان دولتلردن تشکیل تاپگن خلق ارا کوچ بو حدود خوفسیزلیگینی تٲمینلش مسئولیتینی آله‌دی.
نتانیاهو‌نینگ قۉشیمچه قیلیشیچه، “اسراییل مستقل دولت‌دیر. بیز اۉز واسطه‌لریمیز بیلن اۉزیمیزنی حمایه قیله‌میز و کېله‌جگیمیزنی اۉزیمیز تٲمینله‌یمیز. بونینگ اوچون هېچ کیم‌نینگ راضیلیگی‌گه محتاج اېمس‌میز. خوفسیزلیگیمیزنی اۉزیمیز نظارت قیله‌میز”.
بیراق اسراییل تورکیه‌نینگ اوشبو ماموریت‌ده اشتراکی‌گه قرشی. آتیش-کېسین‌نی قبول قیلگنی اوچون ائتلافی حکومتیده‌گی قتیق آقیملر تامانیدن باسیم آستیده بۉلگن نتانیاهو یکشنبه کونی اورشلیم(بیت‌المقدس)ده وزیرلر کېنگشی‌نینگ ییغیلیشیده قطعی جهتنی اېگلله‌دی.
