آلمان‌نینگ هامبورگ شهریده یشاوچی اۉزبېکلر فرهنگی و اجتماعی اویوشمه‌سی تشبثی بیلن طنطنه‌لی بیر احتفال اۉتکزیلیب، اۉزبېک تیلی ملی کونی‌دن نشان‌لندی.
اوشبو ییغین‌ده، فعاللر، شاعرلر، یازووچیلر و عیاللر کینگ اشتراک اېتیب، تیل بیره‌می و افغانستان‌ده اۉزبېک تیلی وضعیتی خصوصیده فکر بیلدیرگنلر.
هامبورگ شهریده اۉتکزیلگن اوشبو احتفال دایره‌سیده «اۉزبېک تیلی، خوف آستیده بۉلگن تاریخی اۉزلیک» نامی آستیده، پنل هم اۉتکزیلیب، اشتراکچیلر تیلی‌میز احوالی خصوصیده فکر بیلدیرگنلر.
اوشبو پنل اشتراکچیلری، افغانستان‌ده تورلی حکومت‌لر و سیاسی تیزیم‌لر دوریده، اۉزبېک تیلی‌گه نسبتن تیزیملی روشده چیکلاولر یره‌تیلیب، بو تیل چیت‌ده قالیشی‌گه سعی‌وحرکت اېتیلگنینی معلوم قیلدی‌لر.
شونینگدېک بو احتفالده اشتراک قیلگن فعاللر، افغانستان‌ده قانونی بیر حکومت بۉلمه‌گن حاضرگی شرایط‌ده اۉزبېک تیلی اینگ آغیر احوالده بۉلگنینی تاکیدلب، بو تیل رواجی اوچون هیچ قنده‌ی بیر اونملی ریجه بۉلمه‌گنیدن تنقید قیلگنلر.
مذکور احتفالده اشتراکچیلر، اۉزبېک تیلی‌نینگ تاریخی اۉرنی‌دن اېسلب، بو تیل رواجی اوچون جدی سعی‌وحرکت اېتیلیشینی اورغوله‌دیلر.
