عقرب آیی‌نینگ ۸ – سی، افغانستان معاصر تاریخیده عدالتلی بیر سیاسی تیزیم اوچون سیس چیقارگن ییریک سیاسی سیمالردن طاهر بدخشی‌نینگ وفاتی ییللیگی مناسبتی بیلن ماس دیر.
افغانستان معاصر تاریخیده‌گی ییریک سیاسی سیمالردن طاهر بدخشی وفاتی ییللیگی ییتیب کېلر اېکن، کۉپلب فعاللر بو سیمانینگ سیاسی توشینچه‌سی و عدالتلی تفکری حقیده فکر بیلدیریب، اېسده‌لیکلرینی یازیب کېلماقده دیر.
خلق‌میزنینگ تانیقلی یازووچیلریدن حلیم یارقین اۉزی‌نینگ فیسبوک صحیفه‌سیده، بدخشی خاطره‌سیگه بغیشلب یازگن یازوویده، بو ییریک سیما حمایه‌سیده، افغانستان معارف بۉلیمیده اۉزبېکچه کتابلر تالیف و چاپ اېتیلگنینی اېسله‌گن.
یارقین جنابلری‌نینگ یازیشیچه، ۱۳۵۷ – ییلی افغانستانده یوز بېرگن اوزگریش‌دن کېین، محمدطاهر بدخشی معارف وزیرلیگیده تالیف و ترجمه ریاست باشلیغی تعیین‌لنگن. بو قرار آرتیدن عبدالحکیم شرعی جوزجانی و محمدطاهر بدخشی تشبثی بیلن اوچینچی تیللر اوچون تالیف و ترجمه دیپارتمنتی آچیلگن. بدخشی بو دیپارتمنت اینقسه اۉزبېکچه کتابلر تالیف و چاپ اېتیلیشینی شخصی حمایه و تشویق قیلگن.
عینی حالده حلیم یارقین جنابلری طاهر بدخشی‌نینگ عدالتلی توشینچه‌سیدن هم اېسلب، بو ییریک سیما ظالملرچه یۉق قیلینگنینی بیلدیردی.
یارقین بو خصوصده یازیشیچه ” بویوک ملی کۉره شچی، افغانستانده بیرینچی یۉله “ملی ستم” و افغانستان تورلی اتنیک خلقلری سیاسي، اجتماعي و مدنې تېنگ حقوققه اېگه بۉلیشلری، منطقه لر اداره سی اۉز یشاوچیلری تماندن باشقریلیشی کبیلرنی نظر و عملده کۉنده‌لنگ قۉیگن تاریخي پارلاق سیما ظالملرچه یۉق قیلیندی.”
ایتیش کېره‌ک که طاهر بدخشی افغانستان سیاستیده آز وقت قالگن بۉلسه‌ده، بیراق اۉزی‌دن خاص تفکر و توشینچه قالدیرگن که افغانستانده اجتماعی عدالت‌سیزلیکلر دایمی بیر معما بۉلگنی باعث، بدخشی‌نینگ توشینچه‌سی عدالتلی بۉلگنی اوچون حاضرگچه قدرلنیب کېلماقده دیر.
ایتیش کېره‌ک که سیاستچی، یازوچی و فعال محمدطاهر بدخشی قویاش ۱۳۱۲ – ییل، بدخشان‌نینگ فیض آباد شهریده دنیاگه کېلیب و قویاش ۱۳۵۸ – ییل عقرب آیی‌نینگ ۸ – سی کابل شهری‌نینگ پلچرخی قماقخانه‌سیده، اۉغلی بایقرا بدخشی بیلن بیرگه اۉققه توتیلیب اۉلدیریلدی.
