بیرلشکن ملتلر تشکلاتی اقلیم اۉزگریشی بۉییچه کنوانسیونی اعضالری اۉتیزینچی ییغیلیشی «کاپ30»، بوگون برازیل نینگ بلم شهریده 190 دن آرتیق مملکت اشتراکیده باشلندی.
رویترز دوشنبه، 10-نوامبر گزارش بېریشیچه، ایکّی هفته‌لیک اوشبو ییغین دوامیده قَیسی موضوعلر اوستیگه بحث اېتیلیشی حلی انیق اېمس دیر.
خبرگه کۉره، ایریم اشتراکچی دولتلر، جمله‌دن برازیل، بو سفر ییغیلیشده تۉلیق کېلیشوو طلب قیلمه‌یدیگن، کیچیک و عملي چاره‌لرگه اعتبار قره‌تیشنی تکلیف اېتگن.
حساباتده ایتیلیشیچه، ییللر دوامیده اۉتکزیلگن کاپ ییغیلیشلریده کتّه وعده بېریلگن بۉلسه-ده، اولر نینگ اکثریتی عملده بجریلمه‌گن.
کاپ30 رئیسی آندره کوریا دولاگو، چین نینگ مذاکره‌لرده‌گی رۉلی نینگ آرتیب باره‌یاتگنینی تأکیدلب، ارزان چینچه «یشیل تکنالوژي‌لر» جهانی انرژی اۉتیش جریانیده مهم ا‌ۉرین توته‌‌یاتگنینی ایتگن.
بونگچه دنیا نینگ تورلی بیلیم یورتلری و علمي مرکزلریده‌گی عالِملر موزلیکلر و موز قتلملری خوفلی تېزلیکده یۉقاله‌یاتگنی حقیده آگاهلنتیریب، ژیوپلیتیکی ترنگلیکلر کاپ30 ییغینی نینگ اهمیتینی په‌س‌یتیرمسلیگی کېره‌کلیگینی تأکیدله‌گن اېدیلر.
کاپ30 کون ترتیبیگه ایسّیقخانه گازلری چیقیندیلرینی کمیتیریش، دهقانچیلیکده اصلاحاتلر و جهانی ایسیش بیلن کوره‌شیش اوچون مالیه‌لشتیریش مسأله‌لری کیریتیلگن.
