طالبان نینگ حج و اوقاف وزیرلیگی ساچ یاکه سقال قیرقیشنی عیالگه اۉخشش، حرام و تقیقلنگن دېب اعلام قیلدی.
وزیرلیک بوگون چارشنبه، 28 – عقرب اوشبو هفته‌ده‌گی جمعه نمازی خطیبی‌گه عاید موضوعنی اعلام قیلیب، خطبه‌خانلردن «الله تعالی نینگ یره‌تیلیشینی اۉزگرتیریش، جمله‌دن سقال قیرقیش، فطره‌تگه ضد و کتّه گناه‌دیر»دېگن موضوع اوستیده نطق قیلیشلرینی سۉره‌گن.
وزیرلیک بو موضوع بۉییچه بېرگن ایضاحیده شونده‌ی دېگن: «اېرکک سقالینی قیرگنده، او اصلیده اۉزینی عیالگه اۉخشه‌تگن و بېزه‌کینی یۉق قیلگن بۉله‌دی.»
حج و اوقاف وزیرلیگی قۉشیمچه قیلیشیجه، عیال نینگ بېزه‌گی ساچده، اېرکک نینگ بېزه‌گی اېسه سقالده بۉله‌دی.
وزیرلیک حدیثگه مراجعت قیلگن حالده شونده‌ی دېگن: الله اېرککلرنی اۉزلرینی عیالگه اۉخشتگنلری‌نی و عیاللرنی اۉزلرینی اېرکک‌که اۉخشه‌تگنلری اوچون لعنتله‌گن.
ایضاحلرده باشقه بیر حدیثگه هم مراجعت قیلینیب، سقالینی قیرقگن کیشی جزالنیشی لازملیگی ایتیلگن.
وزیرلیک قۉشیمچه قیلگن: سقالنی تۉلیق قیریش یهوديلر، هندولر و اوزگه محبوسیلر نینگ عادتیدیر.
طالبان نینگ حج و اوقاف وزیرلیگی، شونینگدېک، عیاللر نینگ ساچلرینی بۉیش ، صنعي ساچدن فایده‌لنیش، تیرناغلرینی بۉیش، قاش و کیپریکنی تۉغریلش، لبلر نینگ اۉلچمی و شکلینی اۉزگرتیریش، تیشلرنی قیرقیش یاکه یوپقله‌تیش و طبيعي تیشلر اوستیگه پلاستیکی تیش قۉییشنی هم الله نینگ یره‌تیلیشینی اۉزگرتیریش و حرام دېب بیله‌دی.
طالبان افغانستانده قَیته حاکمیتگه کېلگنیدن بېری یشاوچیلر نینگ شخصي و اجتماعي حیاتیگه کېنگ کۉلملی چېکلاولر جاري قیلگن.
اوشبو گروه حاضرگچه عیاللرگه و یاش اېرککلرگه سقال قیرقیش یاکه قیسقرتیریش همده اولر نینگ کيینیش قاعده‌لریگه رعایه قیلمه‌گنلیک اوچون بیر نېچه بار حبس قۉیگن و قماققه آلگن.
خلق‌ارا انسان حقلری تشکیلاتلری بو چاره‌لرنی انسان حقلرینی بوزیش، اساسي اېرکینلیکلرنی یۉق قیلیش و انسان قدر-قیمتینی کمسیتیش دېب بهاله‌گن همده اولرنی توخته‌تیشنی طلب قیلگن.
