بیرلشکن ملتلر تشکیلاتی‌نینگ افغانستانده‌گی نماینده‌لیگی یا ده «یوناما» افغانستانده خاتین-قیزلرگه نسبتن دوام اېتیب تورگن چیکلاولردن خواطر بیلدیردی.
یوناما ۲۵ – نوامبر عیاللرگه قرشی زوره‌وانلیکلرنی توگه‌تیش خلق‌ارا کونی مناسبتی بیلن نشر قیلگن حساباتیده، افغانستانده عیاللر آغیر احوالده بۉلگنیدن آگاه‌لنتیردی.
اوشبو حساباتده کېلیشیچه، اۉتگن ایککی ییل دوامی‌ده افغانستانده زوره‌وانلیک خوفی بیلن دوچ بۉلگن عیاللر سانی ۴۰ فایز کۉپه‌یگن.
افغانستان خاتین-قیزلریدن ۱۴.۲ میلیون کیشی قوللب-قوتلنیشی ضرورلیگی قید اېتیلگن یوناما حساباتیده.
یوناما بو حقده یازیشیچه “ایککی ییل دوامی‌ده افغانستانده زوره‌وانلیک خوفی بیلن دوچ بۉلگن خاتین-قیزلر سانی ۴۰ فایز آشگن. شوندی وضعیت که حاضر افغانستانده ۱۴.۲ میلیون عیال قوللب-قوتلنیشی ضرور دیر.”
عینی حالده بیرلشکن ملتلر تشکیلاتی، افغانستانده عیاللرنی قوللب-قوتلش اوچون یاردم ییتکزیش بودجه‌لری آزلیگیدن هم آگاه‌لنتیریب، سونگی وقتلر ایچیده افغانستانده عیاللر تامانیدن باشقریلیب کېله‌یاتکن تشکیلاتلر بودجه‌سی بیش حصه‌سیدن بیر حصه‌سینی قۉلدن بېرگن.
شونینگدېک یوناما، طالبان حکومتی‌دن هم خاتین-قیزلرگه نسبتن چیکلاولرنی بیکار قیلیشینی سۉره‌دی.
افغانستانده بیرلشکن ملتلر تشکیلاتی باش کاتبی مخصوص وکیلی‌نینگ اۉرین باسری جورجت گانیون نینگ ایتیشیچه “افغانستان‌نینگ دی‌فاکتو حاکملریدن خاتین-قیزلرگه نسبتن چیکلاولرنی توگه‌تیشینی سۉره‌گن بیرحالده، خلق‌ارا هم‌جمعیتیدن هم قوللب-قوتلش بوتون یۉللرینی سقلشینی خواهله‌یمیز. کۉپلب توسیق‌لیکلر بار بیر شرایط‌ده افغانستان عیاللر اۉزلریدن کۉپ جسارت کۉرسه‌تماقده دیر.”
ایتیش کېره‌ک که اۉتگن تۉرت ییل دوامی‌ده، طالبان خلق‌ارا طلب‌لرگه تَن بېرمه‌ی افغانستانده خاتین-قیزلرگه نسبتن چیکلاولرنی آشیریب کېلماقده دیر.
