پاکستان تشقی ایشلر وزیری محمد اسحاق دار ایتیشیچه، بو مملکت یقینده طالبان بیلن یوزهگه کېلگن تۉقنهشوو چاغیده افغانستانده «تازهلش عملیاتی»نی باشلشگه تیار بۉلگن.
او بوگون شنبه 8 – قوس مطبوعات ییغینیده ایتیشیچه، قطر و تورکيه نینگ واسطهچیلیک تکلیفی طفیلی اوشبو اۉپراسیون عملگه آشمهگن.
پاکستان تشقی ایشلر وزیری قۉشیمچه قیلیب شوندی دېدی: «اولر، احتمال، رېجهلشتیریلگن حربي عملیاتیمیزدن خبردار بۉلیشگن و اولر نینگ حکومتی واسطهچیلیکنی آسانلشتیریش اوچون هر ساعتده مېن بیلن علاقهده اېدی.»
اونینگ سۉزلریگه کۉره، واسطهچیلر طالبان اۉز ی بحث اېتیلگن موضوع دن چېکینیشنی رد اېتگچ، «ناقولهی حالتده آرتگه قَیتیشگه مجبور بۉلگن».
چمهسی بیر یریم آی آلدین طالبان و پاکستان قریب بیر هفته دوامیده تۉقنهشگن اېدی؛ بو تۉقنهشوو ایکّی تامان اوچون آغیر تلفاتلر کېلتیرگن.
اوشبو ماجرا دوامیده پاکستان کابل و قندهار نینگ اَیریم حدودلریگه بیر نېچه مرته هوا هجومی اویوشتیرگن.
پاکستاندهگی ییتکیرمهلر بو هجوملرده «فتنه کېلتیرووچی خارجي عنصرلر»یعنی پاکستان طالبان حرکتی (تی تی پی) نشانگه آلینگنینی خبر قیلگن، بیراق طالبان اېسه بو هجوملرده نشان اصلیده تینچ اهالی نینگ اویلری بۉلگنینی ادعا قیلگن.
بو تۉقنهشوو قطر و تورکيه نینگ واسطهچیلیگی بیلن تۉختهتیلگن و ایکّی تامان دوحه همده ایستانبولده اوچ مرته مذاکره گه اۉتیرگن.
اما مذاکرهلر آخر-عاقبت موفقیتسیز یکونلنگن و هېچ قندهی کېلیشووگه اېریشیلمهگن.
مذاکرهلردن خبردار بیر قنچه منبعلر نینگ ایتیشیچه، ایکّی تامان اۉرتهسیدهگی اساسي کېلیشماوچیلیک پاکستان طالبانی حرکتی نینگ افغانستان حدودیدن فایدهلنیشی مسألهسی بۉلگن.
پاکستان نینگ ادعا قیلیشیچه، تی تی پی افغانستان حدودیدن پاکستانگه قرشی حرکت قیلماقده و اونینگ یېتکچیلری همده اعضالری بو مملکتده جایلشگن.
پاکستان رسميلری افغانستاندهگی طالبان حکومتیدن تی تی پی اعضالرینی نظارت قیلیش یاکه اولرنی تاپشیریشنی طلب قیلماقده.
اما افغانستاندهگی طالبان اېسه تی تی پی نی پاکستان نینگ ایچکی معماسی دېب بیلیشینی و بو معمانی حل قیله آلمهسلیگینی اَیتماقده
