طالبان نینگ محلي مسووللری و محلي منبعلر ارزگانده بیر ییگیت اۉلدیریلگنی همده زابلده بیر اېرکک نینگ جسدی تاپیلگنی حقیده خبر بېریشگن.
طالبان نینگ ارزگان ولایتی خوفسیزلیک قوماندانلیگی معلوم قیلیشیچه، بوگون پنجشنبه، 13- چوره تومنیده بیر ییگیت اۉق آتیش نتیجهسیده هلاک بۉلگن.
محلي منبعلر نینگ ایتیشیچه، بو ییگیت نینگ اسمی سمیع الله بۉلیب، اصلیده گیزاب تومنی نینگ اهالیسی اېدی.
منبعلرگه کۉره، او قوراللنگن شخصلر بیلن تۉقنهشوو عاقبتیده اۉلدیریلگن.
طالبان نینگ خوفسیزلیک قوماندانلیگی ایتیشیچه، بو قاتللیک بیلن باغلیق ایکّی کیشی قۉلگه آلینگن.
قوماندانلیک اوشبو قاتللیک نینگ سببینی «شخصي عداوت» دېب بیان قیلگن.
شو بیلن بیرگه، زابلدن کېلگن محلي خبرلرگه کۉره، بوگون شاه جوی تومنیده بیر قرییهنی جسدی تاپیلگن.
منبعلر ایتیشیچه، بو اېرکک نینگ جسدی شاه جوی تومن بازاریده محلي اهالی تامانیدن تاپیلگن.
منبعلرگه کۉره، هلاک بۉلگن کیشی نینگ شخصی و اونی اۉلدیریش سببی حلی انیقلنمهگن.
سۉنگگی پیتلرده مملکت نینگ تورلی ولایتلریده قاتللیک حالتلری کۉپهیگن.
کېچه هم هلمند ولایتیده بیر اېرکک نینگ جسدی تاپیلگنی حقیده خبر بېریلگندی.
