اروپا اتفاقینینگ افغانستان بۉییچه مخصوص نمایندهسی ژیل برتران، کابلگه سفری دوامیده طالبلر تشقی ایشلر وزیری امیرخان متقي بیلن اوچرهشدی و صحبتلشدی.
طالبلر تشقی ایشلر وزیرلیگی بوگون( چهارشنبه ۱۹ قوس) اوشبو اوچرهشوو حقیده بیانات بېردی.
وزیرلیکنینگ ادعاسیگه کۉره، اروپا اتفاقی مخصوص وکیلی بو گروه نینگ خوفسیزلیک، اقتصاد و مهاجرلرنی قبول قیلیش ساحهلریدهگی یوتوقلرینی مختهگن همده اروپا اتفاقی تامانیدن افغانستانگه یاردملر دوام اېتیشیگه ایشانچ بیلدیرگن.
وزیرلیکنینگ قۉشیمچه قیلیشیچه، او شونینگدېک اروپا اتفاقینینگ افغانستان اقتصادی، خصوصاً خصوصي سکتورنی قۉللب-قوّتلشگه اعتبار قرهتهیاتگنینی ایتگن و طالباننی خارجي ییریک شرکت سرمایهسینی جلب قیلیشده همکارلیک قیلیشگه چقیرگن.
اوچرهشوو دوامیده طالبلر تشقی ایشلر وزیری اروپا اتفاقیدن افغانستاننینگ تورلی ساحهلرده ترقیاتی یۉلیده ایجابي قدملر تشلشنی طلب قیلگن.
اروپا اتفاقینینگ افغانستان بۉییچه مخصوص نمایندهسی ژیل برتران ایکّینچی سفری حسابلنهدی.
او اۉتگن میزان آییده هم افغانستانگه تشریف بویورگن اېدی. اوشبو آلتی کونلیک سفر یکونیده ژیل برتران«افغانستان اوچون یگانه یېچیم کۉپ تامانلهمه جریان و افغانستان ایچیدهگی مذاکرهلردیر دېگن اېدی.»
