افغانستان اېرکین عاموي اخبارات واسطهلرینی قۉللب-قوّتلاوچی «نی» تشکیلاتی (سورگونده) قندوزده طالبان تامانیدن ژورنالیست ناظره رشیدی قماققه آلینگنیگه مناسبت بیلدیریب، او بیلن قماقده «اوروش اسیری» کبی معامله قیلینهیاتگنینی ایتدی.
«نی» تشکیلاتی ناظره رشیدی نینگ یقینلریگه تهیهنیب معلوم قیلیشیچه، او طالبان قماقخانهسیده تاباره کوچهییب بارهیاتگن زۉروانلیککه دوچ کېلماقده و قماق ایچیده اونینگ قۉل-آیاقلری زنجیر بیلن باغلنگن.
«نی» بیاناتیده قندوزدهگی اوشبو محلي ژورنالیست نینگ عایلهسیگه یقین منبعدن اقتباس کېلتیریلیب، ایتیلیشیچه، ناظره رشیدی اۉتگن هفته چهارشنبه کونی بیر تیلفون قۉنغیراغینی آلگچ، اوییدن تشقریگه چیققن و شوندن سۉنگ طالبان تامانیدن تعقیب قیلینیب، حبسگه آلینگن.
تبعیددهگی «نی» تشکیلاتی ناظره رشیدی نینگ حالتیدن جدّي خواطر بیلدیردی و خلقارا تشکیلاتلر، جملهدن بیرلشگن ملتلر تشکیلاتیدن طالبانگه باسیم اۉتکزیب، ناظره رشیدی نینگ آزاد اېتیلیشیگه زمینه یرهتیشنی سۉرهدی.
ایتیش کېرک که، قوندوزدهگی محلي تلویزیونلردن بیریده ایشلهگن ژورنالیست ناظره رشیدی بېش کوندن بېری طالبان قماقخانهسیده سقللنماقده.
